ਤਰੀਕ ‘ਤੇ ਤਾਰੀਖ ਨਹੀਂ, ਪੈਰੋਲ ‘ਤੇ ਪੈਰੋਲ ਸਜ਼ਾਯਾਫ਼ਤਾ ਗੁਰਮੀਤ ਰਾਮ ਰਹੀਮ ‘ਤੇ ਰੱਜ ਕੇ ਵਰ੍ਹ ਰਹੀ ‘ਕਿਰਪਾ’

ਗੁਰਮੀਤ ਰਾਮ ਰਹੀਮ

ਚਾਰ ਸਾਲਾਂ ਵਿੱਚ ਛੇ ਮਹੀਨੇ ਜੇਲ੍ਹ ਵਿੱਚੋਂ ਬਾਹਰ, ਇਹ ਹਿਸਾਬ-ਕਿਤਾਬ ਹੈ ਰੇਪ ਅਤੇ ਕਤਲ ਕੇਸਾਂ ਵਿੱਚ ਉਮਰ ਕੈਦ ਦੀ ਸਜ਼ਾ ਕੱਟ ਰਹੇ ਡੇਰਾ ਸੱਚਾ ਸੌਦਾ ਮੁਖੀ ਗੁਰਮੀਤ ਰਾਮ ਰਹੀਮ (Gurmeet Ram Rahim) ਦਾ। ਰਾਮ ਰਹੀਮ ਰੋਹਤਕ ਦੀ ਸੁਨਾਰੀਆ ਜੇਲ ‘ਚ ਕੈਦੀ ਨੰਬਰ 1997 ਦੇ ਤੌਰ ‘ਤੇ ਆਪਣੀ ਸਜ਼ਾ ਕੱਟ ਰਿਹਾ ਹੈ ਪਰ ਸੋਮਵਾਰ 20 ਨਵੰਬਰ ਨੂੰ ਹਰਿਆਣਾ ਸਰਕਾਰ ਤੋਂ 21 ਦਿਨਾਂ ਦੀ ਫਰਲੋ ਮਿਲਣ ਤੋਂ ਬਾਅਦ ਉਹ ਅੱਜ ਜੇਲ ‘ਚੋਂ ਬਾਹਰ ਵੀ ਆ ਗਿਆ ਹੈ।

ਰਾਮ ਰਹੀਮ 2023 ਵਿੱਚ ਤੀਜੀ ਵਾਰ ਜੇਲ੍ਹ ਤੋਂ ਬਾਹਰ ਆ ਰਿਹਾ ਹੈ। ਇਸ ਵਾਰ ਵੀ ਉਹ ਉੱਤਰ ਪ੍ਰਦੇਸ਼ ਦੇ ਬਰਨਾਵਾ ਆਸ਼ਰਮ ‘ਚ ਰਹੇਗਾ। ਰੋਹਤਕ ਪ੍ਰਸ਼ਾਸਨ ਨੇ ਰਾਮ ਰਹੀਮ ਨੂੰ ਬਰਨਾਵਾ ਆਸ਼ਰਮ ਵਿੱਚ ਬਿਤਾਏ ਪੈਰੋਲ ਅਤੇ ਫਰਲੋ ਦੌਰਾਨ ਉਸ ਦੇ ਚਾਲ-ਚਲਣ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਇੱਕ ਵਾਰ ਫਿਰ ਫਰਲੋ ਦਿੱਤੀ ਹੈ।

2023 ਵਿੱਚ ਤਿੰਨ ਮਹੀਨਿਆਂ ਲਈ ਜੇਲ੍ਹ ਤੋਂ ਬਾਹਰ

ਇਸ ਸਾਲ ਦੇ ਸ਼ੁਰੂ ਵਿੱਚ ਡੇਰਾ ਸੱਚਾ ਸੌਦਾ ਮੁਖੀ ਨੂੰ ਲੰਬੀ ਪੈਰੋਲ ਦਿੱਤੀ ਗਈ ਸੀ। ਹਰਿਆਣਾ ਸਰਕਾਰ ਨੇ 22 ਜਨਵਰੀ 2023 ਨੂੰ ਰਾਮ ਰਹੀਮ ਨੂੰ 40 ਦਿਨਾਂ ਦੀ ਪੈਰੋਲ ਮਨਜ਼ੂਰ ਕੀਤੀ ਸੀ। ਇਸ ਤੋਂ ਬਾਅਦ 19 ਜੁਲਾਈ ਨੂੰ ਮੁੜ ਰਾਮ ਰਹੀਮ ਨੂੰ 30 ਦਿਨਾਂ ਦੀ ਪੈਰੋਲ ਮਿਲੀ। ਹਾਲ ਹੀ ਵਿੱਚ 21 ਦਿਨਾਂ ਦੀ ਫਰਲੋ ਤੋਂ ਬਾਅਦ, ਰਾਮ ਰਹੀਮ ਨੂੰ ਇਸ ਸਾਲ 91 ਦਿਨ ਜੇਲ੍ਹ ਤੋਂ ਬਾਹਰ ਰਹਿਣ ਦੀ ਇਜਾਜ਼ਤ ਦਿੱਤੀ ਗਈ ਸੀ। ਹਾਲਾਂਕਿ ਜੇਕਰ ਇਸ ਸਾਲ ਕੋਈ ਹੋਰ ਪੈਰੋਲ ਜਾਂ ਫਰਲੋ ਨਹੀਂ ਦਿੱਤੀ ਗਈ ਤਾਂ ਰਾਮ ਰਹੀਮ ਨਵਾਂ ਸਾਲ ਸਲਾਖਾਂ ਪਿੱਛੇ ਬਿਤਾਏਗਾ।

2022 ਵਿੱਚ ਵੀ ਤਿੰਨ ਮਹੀਨੇ ਜੇਲ੍ਹ ਤੋਂ ਬਾਹਰ

ਜੇਕਰ ਅਸੀਂ 2023 ਦੀ ਪੈਰੋਲ ਅਤੇ ਫਰਲੋ ਨਾਲ ਤੁਲਨਾ ਕਰੀਏ ਤਾਂ 2022 ਵਿੱਚ ਰਾਮ ਰਹੀਮ ਦੀ ਰਿਹਾਈ ਉਲਟ ਦਿਸ਼ਾ ਤੋਂ ਸ਼ੁਰੂ ਹੋਈ। ਰਾਮ ਰਹੀਮ ਨੂੰ ਤਿੰਨ ਵਾਰ ਜੇਲ੍ਹ ਤੋਂ ਬਾਹਰ ਸਮਾਂ ਬਿਤਾਉਣ ਦੀ ਇਜਾਜ਼ਤ ਦਿੱਤੀ ਗਈ, ਪਹਿਲਾਂ 21 ਦਿਨ, ਫਿਰ 30 ਦਿਨ ਅਤੇ ਅੰਤ ਵਿੱਚ 40 ਦਿਨ। ਪਹਿਲੇ 21 ਦਿਨਾਂ ਦੀ ਫਰਲੋ 7 ਫਰਵਰੀ, 2022 ਨੂੰ ਦਿੱਤੀ ਗਈ ਸੀ। ਉਸ ਤੋਂ ਬਾਅਦ ਹਰਿਆਣਾ ਸਰਕਾਰ ਨੇ 17 ਜੂਨ ਨੂੰ 30 ਦਿਨ ਅਤੇ 14 ਅਕਤੂਬਰ ਨੂੰ 40 ਦਿਨ ਦੀ ਪੈਰੋਲ ਦਿੱਤੀ ਸੀ।

2020 ਅਤੇ 2021 ਵਿੱਚ ਸਿਰਫ਼ 2 ਦਿਨ

ਰਾਮ ਰਹੀਮ 2022 ਅਤੇ 2023 ‘ਚ ਲਗਭਗ ਤਿੰਨ-ਤਿੰਨ ਮਹੀਨੇ ਜੇਲ ਤੋਂ ਬਾਹਰ ਰਿਹਾ ਸੀ ਪਰ 2020 ਅਤੇ 2021 ‘ਚ ਸਿਰਫ 2 ਦਿਨ ਦੀ ਪੈਰੋਲ ਹਾਸਲ ਕਰ ਸਕਿਆ ਸੀ। ਉਦੋਂ ਹਰਿਆਣਾ ਦੀ ਮਨੋਹਰ ਲਾਲ ਖੱਟਰ ਸਰਕਾਰ ਨੇ ਗੁਰਮੀਤ ਨੂੰ ਆਪਣੀ ਬੀਮਾਰ ਮਾਂ ਨੂੰ ਮਿਲਣ ਲਈ ਇੱਕ ਦਿਨ ਦੀ ਪੈਰੋਲ ਦਿੱਤੀ ਸੀ।

ਰੇਪ ਅਤੇ ਕਤਲ ਦੇ ਮਾਮਲਿਆਂ ਵਿੱਚ ਕੱਟ ਰਿਹਾ ਸਜ਼ਾ

ਅਗਸਤ 2017 ਵਿੱਚ ਭਗਵਾਨ ਦਾ ਅਵਤਾਰ ਹੋਣ ਦਾ ਦਾਅਵਾ ਕਰਨ ਵਾਲੇ ਰਾਮ ਰਹੀਮ ਨੂੰ 20 ਸਾਲ ਦੀ ਸਜ਼ਾ ਸੁਣਾਈ ਗਈ ਸੀ। ਗੁਰਮੀਤ ਨੂੰ ਇਹ ਸਜ਼ਾ ਦੋ ਵਿਦਿਆਰਥਣਾਂ ਨਾਲ ਰੇਪ ਦੇ ਮਾਮਲੇ ਵਿੱਚ ਦਿੱਤੀ ਗਈ ਸੀ। ਇਸ ਤੋਂ ਇਲਾਵਾ ਰਾਮ ਰਹੀਮ ਨੂੰ ਅਕਤੂਬਰ 2021 ਵਿੱਚ ਆਪਣੇ ਹੀ ਡੇਰੇ ਦੇ ਇੱਕ ਕਰਮਚਾਰੀ ਦੀ ਹੱਤਿਆ ਦੇ ਮਾਮਲੇ ਵਿੱਚ ਦੋਸ਼ੀ ਪਾਏ ਜਾਣ ਤੋਂ ਬਾਅਦ ਅਦਾਲਤ ਨੇ ਉਮਰ ਕੈਦ ਦੀ ਸਜ਼ਾ ਸੁਣਾਈ ਸੀ।

ਰਾਜਸਥਾਨ ਚੋਣਾਂ ਨਾਲ ਕੋਈ ਸਬੰਧ?

56 ਸਾਲਾ ਰਾਮ ਰਹੀਮ ਦੀ ਰਿਹਾਈ ਨੂੰ ਰਾਜਸਥਾਨ ਵਿਧਾਨ ਸਭਾ ਚੋਣਾਂ ਨਾਲ ਵੀ ਜੋੜਿਆ ਜਾ ਰਿਹਾ ਹੈ। ਰਾਜਸਥਾਨ ਵਿੱਚ 25 ਨਵੰਬਰ ਦਿਨ ਸ਼ਨੀਵਾਰ ਨੂੰ ਵੋਟਾਂ ਪੈਣੀਆਂ ਹਨ ਅਤੇ ਹਰਿਆਣਾ ਦੀ ਸਰਹੱਦ ਨਾਲ ਲੱਗਦੇ ਸ੍ਰੀਗੰਗਾਨਗਰ, ਹਨੂੰਮਾਨਗੜ੍ਹ ਅਤੇ ਹੋਰ ਕਈ ਜ਼ਿਲ੍ਹਿਆਂ ਵਿੱਚ ਗੁਰਮੀਤ ਦਾ ਚੰਗਾ ਪ੍ਰਭਾਵ ਮੰਨਿਆ ਜਾ ਰਿਹਾ ਹੈ।

ਫਰਲੋ ਅਤੇ ਪੈਰੋਲ ਵਿੱਚ ਕੀ ਹੈ ਮੂਲ ਅੰਤਰ?

1. ਫਰਲੋ ਦੀ ਮਿਆਦ ਨੂੰ ਕੈਦੀ ਦੀ ਸਜ਼ਾ ਚ ਛੋਟ ਅਤੇ ਉਸਦੇ ਅਧਿਕਾਰ ਵਜੋਂ ਦੇਖਿਆ ਜਾਂਦਾ ਹੈ, ਜਦੋਂ ਕਿ ਭਾਰਤ ਵਿੱਚ, ਪੈਰੋਲ ਨੂੰ ਕੈਦੀ ਦੇ ਅਧਿਕਾਰ ਵਜੋਂ ਨਹੀਂ ਦੇਖਿਆ ਜਾਂਦਾ ਹੈ। ਕੈਦੀ ਨੂੰ ਉਸ ਦੇ ਚਾਲ-ਚਲਣ ਨੂੰ ਧਿਆਨ ਵਿਚ ਰੱਖਦਿਆਂ ਪੈਰੋਲ ਦਿੱਤੀ ਜਾਂਦੀ ਹੈ।

2. ਫਰਲੋ ਦੇਣ ਦਾ ਉਦੇਸ਼ ਕੈਦੀ ਨੂੰ ਆਪਣੇ ਪਰਿਵਾਰ ਅਤੇ ਸਮਾਜ ਦੇ ਮੈਂਬਰਾਂ ਨੂੰ ਮਿਲਣ ਦੇ ਯੋਗ ਬਣਾਉਣਾ ਹੈ। ਇਸ ਦੇ ਨਾਲ ਹੀ ਪੈਰੋਲ ਰਾਹੀਂ ਇਕ ਤਰ੍ਹਾਂ ਨਾਲ ਕੈਦੀ ਨੂੰ ਸੁਧਾਰ ਦਾ ਮੌਕਾ ਦਿੱਤਾ ਜਾਂਦਾ ਹੈ।