ਗੁਰਦਾਸਪੁਰ ਪੈਲੇਸ ‘ਚ ਉਡੀਕ ਕਰਦਾ ਰਿਹਾ ਲੜਕੀ ਦਾ ਪਰਿਵਾਰ, ਬਾਰਾਤ ਲੈ ਕੇ ਨਹੀਂ ਪਹੁੰਚਿਆ NRI ਲੜਕਾ, ਫਿਰ ਹੋਇਆ ਬਵਾਲ
Gurdaspur Marriage Fraud: ਲੜਕੀ ਦੇ ਪਰਿਵਾਰ ਦਾ ਕਹਿਣਾ ਹੈ ਕਿ ਜਦੋਂ ਉਹ ਸ਼ਗਨ ਵਾਲੇ ਦਿਨ ਮੁੰਡੇ ਦੇ ਸ਼ਹਿਰ ਗਏ ਸਨ ਤਾਂ ਸ਼ਗਨ ਦੌਰਾਨ ਮਾਹੌਲ ਤਣਾਅਪੂਰਨ ਹੋ ਗਿਆ ਸੀ। ਜਦੋਂ ਇੱਕ ਹੋਰ ਮਹਿਲਾ ਉੱਥੇ ਪਹੁੰਚੀ ਤਾਂ ਉਸ ਨੇ ਨੌਜਵਾਨ ਦੇ ਮੂੰਹ 'ਤੇ ਥੱਪੜ ਮਾਰਨੇ ਸ਼ੁਰੂ ਕਰ ਦਿੱਤੇ। ਉਸ ਨੇ ਦੱਸਿਆ ਕਿ ਉਸ ਦਾ ਵਿਆਹ ਇਸ ਨੌਜਵਾਨ ਨਾਲ 2021 ਵਿੱਚ ਹੀ ਹੋ ਚੁੱਕਾ ਸੀ।
Gurdaspur Marriage Fraud: ਗੁਰਦਾਸਪੁਰ ਦੇ ਇੱਕ ਪੈਲੇਸ ਵਿੱਚ ਬਵਾਲ ਹੋ ਗਿਆ। ਇੱਥੇ ਲੜਕੀ ਦਾ ਪਰਿਵਾਰ ਸ਼ਾਮ ਤੱਕ ਪੈਲੇਸ ਵਿੱਚ ਲਾੜੇ ਦੀ ਉਡੀਕ ਕਰਦਾ ਰਿਹਾ, ਪਰ ਐਨਆਰਆਈ ਲਾੜਾ ਵਿਆਹ ਲਈ ਬਾਰਾਤ ਲੈ ਕੇ ਪੈਲੇਸ ਨਹੀਂ ਪਹੁੰਚਿਆ। ਇਸ ਤੋਂ ਬਾਅਦ ਲੜਕੀ ਦੇ ਪਰਿਵਾਰ ਨੇ ਇਹ ਸ਼ਿਕਾਇਤ ਪੁਲਿਸ ਕੋਲ ਦਰਜ ਕਰਵਾਈ, ਜਦੋਂ ਕਿ ਪੁਲਿਸ ਨੇ ਚਾਰ ਲੋਕਾਂ ਖਿਲਾਫ਼ ਮਾਮਲਾ ਦਰਜ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
ਲੜਕੀ ਦੇ ਪਰਿਵਾਰ ਦਾ ਕਹਿਣਾ ਹੈ ਕਿ ਜਦੋਂ ਉਹ ਸ਼ਗਨ ਵਾਲੇ ਦਿਨ ਮੁੰਡੇ ਦੇ ਸ਼ਹਿਰ ਗਏ ਸਨ ਤਾਂ ਸ਼ਗਨ ਦੌਰਾਨ ਮਾਹੌਲ ਤਣਾਅਪੂਰਨ ਹੋ ਗਿਆ ਸੀ। ਜਦੋਂ ਇੱਕ ਹੋਰ ਮਹਿਲਾ ਉੱਥੇ ਪਹੁੰਚੀ ਤਾਂ ਉਸ ਨੇ ਨੌਜਵਾਨ ਦੇ ਮੂੰਹ ‘ਤੇ ਥੱਪੜ ਮਾਰਨੇ ਸ਼ੁਰੂ ਕਰ ਦਿੱਤੇ। ਉਸ ਨੇ ਦੱਸਿਆ ਕਿ ਉਸ ਦਾ ਵਿਆਹ ਇਸ ਨੌਜਵਾਨ ਨਾਲ 2021 ਵਿੱਚ ਹੀ ਹੋ ਚੁੱਕਾ ਸੀ। ਇਸ ਸਭ ਦੇ ਬਾਵਜੂਦ, ਨੌਜਵਾਨ ਦੇ ਪਰਿਵਾਰ ਨੇ ਲੜਕੀ ਦੇ ਪਰਿਵਾਰ ਨੂੰ ਇਹ ਕਹਿ ਕੇ ਮਨਾ ਲਿਆ ਕਿ ਉਹ ਇਸ ਮਾਮਲੇ ਨੂੰ ਆਪਣੇ ਪੱਧਰ ‘ਤੇ ਹੱਲ ਕਰਨਗੇ।
ਅਗਲੇ ਦਿਨ ਜਦੋਂ ਵਿਆਹ ਦੀ ਬਾਰਾਤ ਆਉਣੀ ਸੀ ਤਾਂ ਲੜਕੀ ਵਾਲੇ ਪਾਸੇ ਤੋਂ ਸਾਰੀਆਂ ਤਿਆਰੀਆਂ ਕਰ ਲਈਆਂ ਗਈਆਂ ਸਨ, ਪਰ ਐਨਆਈਆਈ ਨੌਜਵਾਨ ਅਤੇ ਉਸ ਦਾ ਪਰਿਵਾਰ ਜਲੂਸ ਲੈ ਕੇ ਉੱਥੇ ਨਹੀਂ ਪਹੁੰਚੇ। ਇਸ ਤੋਂ ਬਾਅਦ ਫ਼ੋਨ ਵੀ ਬੰਦ ਰਿਹਾ, ਜਿਸ ਤੋਂ ਬਾਅਦ ਪੀੜਤ ਪਰਿਵਾਰ ਨੇ ਇਸ ਦੀ ਸ਼ਿਕਾਇਤ ਐਸਐਸਪੀ ਗੁਰਦਾਸਪੁਰ ਨੂੰ ਕੀਤੀ।
ਲੜਕੀ ਦੇ ਪਿਤਾ ਨੇ ਲਗਾਏ ਇਲਜ਼ਾਮ
ਪਿੰਡ ਸੋਹਲ ਦੇ ਰਹਿਣ ਵਾਲੇ ਧਰਮਪਾਲ ਪੁੱਤਰ ਮੱਘਰ ਸਿੰਘ ਨੇ ਦੱਸਿਆ ਕਿ ਉਸ ਨੇ ਆਪਣੀ ਛੋਟੀ ਧੀ ਦੀ ਮੰਗਣੀ 18 ਅਕਤੂਬਰ 2024 ਨੂੰ ਕਪੂਰਥਲਾ ਦੇ ਰਹਿਣ ਵਾਲੇ ਪੰਕਜ ਕੁਮਾਰ ਨਾਲ ਕੀਤੀ ਸੀ। ਪੰਕਜ ਕੁਮਾਰ ਕੈਨੇਡਾ ਦੇ ਹੈਲੀ ਫੈਕਸ ਸਿਟੀ ਵਿੱਚ ਰਹਿੰਦਾ ਸੀ। ਉਨ੍ਹਾਂ ਨੇ ਦੱਸਿਆ ਕਿ ਹੁਣ ਪੰਕਜ ਵਿਆਹ ਕਰਵਾਉਣ ਲਈ ਕਪੂਰਥਲਾ ਵਾਪਸ ਆ ਗਿਆ ਸੀ।
ਇਸ ਕਾਰਨ ਉਨ੍ਹਾਂ ਨੇ ਵਿਆਹ ਦੀ ਸ਼ੁਭ ਤਰੀਕ 19 ਫਰਵਰੀ ਤੈਅ ਕੀਤੀ ਸੀ। 18 ਫਰਵਰੀ ਨੂੰ ਉਸ ਦਾ ਪਰਿਵਾਰ ਪੰਕਜ ਨੂੰ ਸ਼ਗਨ ਦੇਣ ਲਈ ਕਪੂਰਥਲਾ ਆਰਸੀਐਫ ਦੇ ਕਮਿਊਨਿਟੀ ਹਾਲ ਪਹੁੰਚਿਆ। ਜਦੋਂ ਪੰਕਜ ਨੂੰ ਸ਼ਗਨ ਦੇਣ ਤੋਂ ਬਾਅਦ ਲੜਕੀ ‘ਤੇ ਇੱਕ ਦੂਜੇ ਨੂੰ ਮੁੰਦਰੀਆਂ ਪਹਿਨਾ ਰਹੇ ਸਨ, ਉਸ ਸਮੇਂ ਅਚਾਨਕ ਇੱਕ ਹੋਰ ਕੁੜੀ, ਸਵਿਤਾ ਪ੍ਰਸਾਦ, ਜੋ ਕਿ ਪਟਨਾ ਦੀ ਰਹਿਣ ਵਾਲੀ ਸੀ, ਉੱਥੇ ਆ ਗਈ। ਇਸ ਤੋਂ ਬਾਅਦ, ਉਹ ਸਟੇਜ ‘ਤੇ ਆਈ ‘ਤੇ ਪੰਕਜ ਨੂੰ ਥੱਪੜ ਮਾਰਨ ਲੱਗੀ ਤੇ ਕਿਹਾ ਕਿ ਉਸ ਦਾ ਵਿਆਹ 2021 ਵਿੱਚ ਪੰਕਜ ਨਾਲ ਹੋਇਆ ਸੀ।
ਇਹ ਵੀ ਪੜ੍ਹੋ
ਧਰਮਪਾਲ ਨੇ ਕਿਹਾ ਕਿ ਉਪਰੋਕਤ ਘਟਨਾ ਤੋਂ ਬਾਅਦ, ਪੰਕਜ ਦੇ ਪਰਿਵਾਰਕ ਮੈਂਬਰਾਂ ਨੇ ਉਸ ਨੂੰ ਦੱਸਿਆ
ਉਨ੍ਹਾਂ ਕਿਹਾ ਕਿ ਉਹ ਇਸ ਮਾਮਲੇ ਨੂੰ ਆਪਣੇ ਪੱਧਰ ‘ਤੇ ਹੱਲ ਕਰਨਗੇ, ਤੁਸੀਂ ਵਾਪਸ ਜਾ ਕੇ ਵਿਆਹ ਦੀਆਂ ਤਿਆਰੀਆਂ ਕਰੋ। 19 ਫਰਵਰੀ ਨੂੰ ਉਨ੍ਹਾਂ ਨੇ ਵਿਆਹ ਲਈ ਗੁਰਦਾਸਪੁਰ ਵਿੱਚ ਇੱਕ ਨਿੱਜੀ ਪੈਲੇਸ ਬੁੱਕ ਕੀਤਾ ਸੀ, ਜਿੱਥੇ ਉਹ ਆਪਣੇ ਸਾਰੇ ਰਿਸ਼ਤੇਦਾਰਾਂ ਸਮੇਤ ਸਮੇਂ ਸਿਰ ਪਹੁੰਚ ਗਏ। ਬਾਰਾਤ ਦੇ ਆਉਣ ਦਾ ਸਮਾਂ ਬੀਤ ਗਿਆ ਸੀ ਪਰ ਪੰਕਜ ਤੇ ਉਸਦੇ ਪਰਿਵਾਰ ਦੇ ਫ਼ੋਨ ਵੀ ਬੰਦ ਰਹੇ ਸਨ।
ਕਾਫ਼ੀ ਸਮਾਂ ਬੀਤ ਜਾਣ ਤੋਂ ਬਾਅਦ, ਉਨ੍ਹਾਂ ਨੂੰ ਲੱਗਾ ਕਿ ਹੁਣ ਵਿਆਹ ਦੀ ਬਾਰਾਤ ਨਹੀਂ ਆਵੇਗੀ। ਉਨ੍ਹਾਂ ਨੇ ਦੱਸਿਆ ਕਿ ਹੁਣ ਤੱਕ ਉਹ ਇਸ ਵਿਆਹ ‘ਤੇ 20 ਲੱਖ ਰੁਪਏ ਖਰਚ ਕਰ ਚੁੱਕੇ ਹਨ। ਉਨ੍ਹਾਂ ਨੇ ਇਸ ਸਬੰਧੀ ਐਸਐਸਪੀ ਗੁਰਦਾਸਪੁਰ ਨੂੰ ਲਿਖਤੀ ਸ਼ਿਕਾਇਤ ਕੀਤੀ। ਐਸਐਸਪੀ ਗੁਰਦਾਸਪੁਰ ਹਰੀਸ਼ ਕੁਮਾਰ ਨੇ ਮਾਮਲੇ ਦੀ ਜਾਂਚ ਧਾਰੀਵਾਲ ਥਾਣੇ ਨੂੰ ਸੌਂਪ ਦਿੱਤੀ।
ਲੜਕੇ ਸਮੇਤ 4 ਲੋਕਾਂ ਦੇ ਮਾਮਲਾ ਦਰਜ
ਦੂਜੇ ਪਾਸੇ ਧਾਰੀਵਾਲ ਥਾਣਾ ਇੰਚਾਰਜ ਸੁਰਿੰਦਰਪਾਲ ਸਿੰਘ ਨੇ ਦੱਸਿਆ ਕਿ ਮਾਮਲੇ ਦੀ ਜਾਂਚ ਕਰਨ ਤੋਂ ਬਾਅਦ ਪੀੜਤ ਧਰਮਪਾਲ ਦੇ ਬਿਆਨ ਦੇ ਆਧਾਰ ‘ਤੇ ਪੰਕਜ ਕੁਮਾਰ ਪੁੱਤਰ ਸਤਪਾਲ, ਸਤਪਾਲ ਪੁੱਤਰ ਰਛਪਾਲ ਰਾਮ, ਕੁਸੁਮ ਲਤਾ ਪਤਨੀ ਸਤਪਾਲ, ਅੰਕੁਸ਼ ਕੁਮਾਰ ਪੁੱਤਰ ਸਤਪਾਲ ਵਾਸੀ ਗੁਰੂ ਨਾਨਕ ਨਗਰ ਸੈਦੇ ਭੁਲਾਣਾ ਕਪੂਰਥਲਾ ਖਿਲਾਫ਼ ਧੋਖਾਧੜੀ ਸਮੇਤ ਵੱਖ-ਵੱਖ ਧਾਰਾਵਾਂ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ। ਪੁਲਿਸ ਨੇ ਇਸ ਸਬੰਧੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
