CBSE Board Exam 2026: CBSE ਨੇ ਬਦਲਿਆ ਨਿਯਮ, 12ਵੀਂ ਦੇ ਵਿਦਿਆਰਥੀ ਹੁਣ ਸਿਰਫ਼ ਇੱਕ ਵਿਸ਼ੇ ਵਿੱਚ ਦੇ ਸਕਣਗੇ ਨੰਬਰ ਸੁਧਾਰ ਪ੍ਰੀਖਿਆ

CBSE ਦਾ ਨਵਾਂ ਨਿਯਮ, 12ਵੀਂ ਦੇ ਵਿਦਿਆਰਥੀ ਹੁਣ ਇੱਕੋ ਵਿਸ਼ੇ 'ਚ ਦੇ ਸਕਣਗੇ ਸੁਧਾਰ

ਕੇਂਦਰੀ ਮਾਧਮਿਕ ਸਿੱਖਿਆ ਬੋਰਡ (CBSE) ਦੀਆਂ 10ਵੀਂ ਅਤੇ 12ਵੀਂ ਦੀਆਂ ਬੋਰਡ ਪ੍ਰੀਖਿਆਵਾਂ 17 ਫਰਵਰੀ ਤੋਂ ਸ਼ੁਰੂ ਹੋਣ ਜਾ ਰਹੀਆਂ ਹਨ। ਇਸ ਦੌਰਾਨ ਸੀਬੀਐਸਈ ਨੇ ਪ੍ਰੀਖਿਆ ਨਿਯਮਾਂ ਵਿੱਚ ਇੱਕ ਅਹਿਮ ਬਦਲਾਅ ਦੀ ਘੋਸ਼ਣਾ ਕੀਤੀ ਹੈ। ਬੋਰਡ ਨੇ 12ਵੀਂ ਜਮਾਤ ਦੇ ਵਿਦਿਆਰਥੀਆਂ ਲਈ ਨਵੇਂ ਨਿਯਮ ਦਾ ਐਲਾਨ ਕੀਤਾ ਹੈ, ਜਿਸ ਵਿੱਚ ਸਪੱਸ਼ਟ ਕੀਤਾ ਗਿਆ ਹੈ ਕਿ ਨੰਬਰ ਸੁਧਾਰ ਲਈ ਹੁਣ ਵਿਦਿਆਰਥੀ ਸਿਰਫ਼ ਇੱਕ ਹੀ ਵਿਸ਼ੇ ਵਿੱਚ ਸਪਲੀਮੈਂਟਰੀ ਪ੍ਰੀਖਿਆ ਦੇ ਸਕਣਗੇ। ਸੀਬੀਐਸਈ ਦਾ ਇਹ ਫੈਸਲਾ ਦੇਸ਼ ਭਰ ਦੇ ਲੱਖਾਂ ਵਿਦਿਆਰਥੀਆਂ ਦੇ ਭਵਿੱਖ ‘ਤੇ ਅਸਰ ਪਾਵੇਗਾ।

ਹੁਣ ਸਿਰਫ਼ ਇੱਕ ਵਿਸ਼ੇ ਵਿੱਚ ਮਿਲੇਗਾ ਨੰਬਰ ਸੁਧਾਰਨ ਦਾ ਮੌਕਾ

ਸੀਬੀਐਸਈ ਨੇ 12ਵੀਂ ਦੇ ਪ੍ਰੀਖਿਆਰਥੀਆਂ ਲਈ ਸਪਲੀਮੈਂਟਰੀ ਪ੍ਰੀਖਿਆ ਨਾਲ ਜੁੜੇ ਨਿਯਮ ਵਿੱਚ ਵੱਡੀ ਤਬਦੀਲੀ ਕੀਤੀ ਹੈ। ਪਹਿਲਾਂ ਦੇ ਨਿਯਮਾਂ ਅਨੁਸਾਰ, 12ਵੀਂ ਦਾ ਨਤੀਜਾ ਆਉਣ ਤੋਂ ਬਾਅਦ ਵਿਦਿਆਰਥੀ ਇੱਕ ਤੋਂ ਵੱਧ ਵਿਸ਼ਿਆਂ ਵਿੱਚ ਨੰਬਰ ਸੁਧਾਰਨ ਲਈ ਸੁਧਾਰ ਪ੍ਰੀਖਿਆ ਵਿੱਚ ਬੈਠ ਸਕਦੇ ਸਨ। ਇਹ ਪ੍ਰੀਖਿਆਵਾਂ ਨਤੀਜਾ ਆਉਣ ਦੇ ਦੋ ਮਹੀਨਿਆਂ ਦੇ ਅੰਦਰ ਹੀ ਕਰਵਾਈਆਂ ਜਾਂਦੀਆਂ ਸਨ। ਪਰ ਹੁਣ ਨਵੇਂ ਨਿਯਮ ਮੁਤਾਬਕ, 12ਵੀਂ ਦੇ ਪ੍ਰੀਖਿਆਰਥੀ ਸਿਰਫ਼ ਇੱਕ ਹੀ ਵਿਸ਼ੇ ਵਿੱਚ ਸਪਲੀਮੈਂਟਰੀ ਪ੍ਰੀਖਿਆ ਦੇ ਕੇ ਆਪਣੇ ਨੰਬਰ ਸੁਧਾਰ ਸਕਣਗੇ।

ਵੱਧ ਵਿਸ਼ਿਆਂ ਲਈ ਅਗਲੇ ਸਾਲ ਦੇਣੀ ਪਵੇਗੀ ਮੁੱਖ ਪ੍ਰੀਖਿਆ

ਬੋਰਡ ਨੇ ਸਪੱਸ਼ਟ ਕੀਤਾ ਹੈ ਕਿ ਜੇਕਰ ਕੋਈ ਵਿਦਿਆਰਥੀ ਇੱਕ ਤੋਂ ਵੱਧ ਵਿਸ਼ਿਆਂ ਵਿੱਚ ਆਪਣੇ ਅੰਕ ਸੁਧਾਰਨਾ ਚਾਹੁੰਦਾ ਹੈ, ਤਾਂ ਉਸ ਨੂੰ ਪਹਿਲਾਂ ਵਾਂਗ ਮੌਕਾ ਤਾਂ ਮਿਲੇਗਾ, ਪਰ ਉਸ ਨੂੰ ਅਗਲੇ ਸਾਲ ਹੋਣ ਵਾਲੀ ‘ਮੁੱਖ ਬੋਰਡ ਪ੍ਰੀਖਿਆ’ ਵਿੱਚ ਸ਼ਾਮਲ ਹੋਣਾ ਪਵੇਗਾ। ਯਾਨੀ ਕਿ ਤੁਰੰਤ ਹੋਣ ਵਾਲੀ ਸਪਲੀਮੈਂਟਰੀ ਪ੍ਰੀਖਿਆ ਰਾਹੀਂ ਸਿਰਫ਼ ਇੱਕ ਵਿਸ਼ੇ ਨੂੰ ਹੀ ਕਵਰ ਕੀਤਾ ਜਾ ਸਕੇਗਾ। ਇੱਕ ਤੋਂ ਵੱਧ ਵਿਸ਼ਿਆਂ ਲਈ ਵਿਦਿਆਰਥੀਆਂ ਨੂੰ ਪੂਰਾ ਇੱਕ ਸਾਲ ਉਡੀਕ ਕਰਨੀ ਹੋਵੇਗੀ।

15 ਜੁਲਾਈ 2026 ਨੂੰ ਹੋਵੇਗੀ ਸਪਲੀਮੈਂਟਰੀ ਪ੍ਰੀਖਿਆ

ਸੀਬੀਐਸਈ ਨੇ ਸਾਲ 2026 ਦੀਆਂ ਬੋਰਡ ਪ੍ਰੀਖਿਆਵਾਂ ਲਈ ਸਪਲੀਮੈਂਟਰੀ ਪ੍ਰੀਖਿਆ ਦਾ ਸੰਭਾਵਿਤ ਸ਼ਡਿਊਲ ਵੀ ਜਾਰੀ ਕਰ ਦਿੱਤਾ ਹੈ। ਬੋਰਡ ਮੁਤਾਬਕ 12ਵੀਂ ਜਮਾਤ ਲਈ ਸਪਲੀਮੈਂਟਰੀ ਪ੍ਰੀਖਿਆ 15 ਜੁਲਾਈ 2026 ਨੂੰ ਪ੍ਰਸਤਾਵਿਤ ਹੈ। ਮਈ 2026 ਵਿੱਚ ਨਤੀਜੇ ਘੋਸ਼ਿਤ ਕੀਤੇ ਜਾਣਗੇ, ਜਿਸ ਤੋਂ ਬਾਅਦ ਸਪਲੀਮੈਂਟਰੀ ਪ੍ਰੀਖਿਆ ਲਈ ਇੱਕ ਵਿਸ਼ੇਸ਼ ਸਰਕੂਲਰ ਜਾਰੀ ਕੀਤਾ ਜਾਵੇਗਾ ਅਤੇ ਫਿਰ ਬੇਨਤੀ ਪ੍ਰਕਿਰਿਆ (Application Process) ਸ਼ੁਰੂ ਹੋਵੇਗੀ।

ਵਿਦਿਆਰਥੀਆਂ ‘ਤੇ ਕੀ ਹੋਵੇਗਾ ਅਸਰ?

ਨਿਯਮਾਂ ਵਿੱਚ ਇਸ ਬਦਲਾਅ ਕਾਰਨ ਵਿਦਿਆਰਥੀਆਂ ਕੋਲ ਨੰਬਰ ਸੁਧਾਰਨ ਦੇ ਮੌਕੇ ਸੀਮਤ ਹੋ ਗਏ ਹਨ। ਅਜਿਹੀ ਸਥਿਤੀ ਵਿੱਚ, ਵਿਦਿਆਰਥੀਆਂ ਲਈ ਇਹ ਬੇਹੱਦ ਜ਼ਰੂਰੀ ਹੈ ਕਿ ਉਹ ਮੁੱਖ ਪ੍ਰੀਖਿਆਵਾਂ ਵਿੱਚ ਹੀ ਸਖ਼ਤ ਮਿਹਨਤ ਕਰਨ। ਜੇਕਰ ਕਿਸੇ ਕਾਰਨ ਇੱਕ ਤੋਂ ਵੱਧ ਵਿਸ਼ਿਆਂ ਵਿੱਚ ਨੰਬਰ ਘੱਟ ਰਹਿ ਜਾਂਦੇ ਹਨ, ਤਾਂ ਸਾਲ ਖ਼ਰਾਬ ਹੋਣ ਦਾ ਖ਼ਤਰਾ ਵੱਧ ਸਕਦਾ ਹੈ ਕਿਉਂਕਿ ਦੁਬਾਰਾ ਪ੍ਰੀਖਿਆ ਦੇਣ ਲਈ ਅਗਲੇ ਸਾਲ ਤੱਕ ਦਾ ਇੰਤਜ਼ਾਰ ਕਰਨਾ ਪਵੇਗਾ।