ਭਾਰਤ ‘ਚ ਨਹੀਂ ਹੋਵੇਗੀ ਗੈਸ ਦੀ ਕਿੱਲਤ! ਸਰਕਾਰ ਨੇ ਬਦਲੀ ਰਣਨੀਤੀ, ਹੁਣ ਇਨ੍ਹਾਂ ਦੇਸ਼ਾਂ ਤੋਂ ਹੋਵੇਗੀ ਸਪਲਾਈ

Image Credit source: AI Generated

ਮੱਧ ਪੂਰਬ ਵਿੱਚ ਚੱਲ ਰਹੀ ਜੰਗ ਕਾਰਨ ਪੈਦਾ ਹੋਏ ਗੈਸ ਸੰਕਟ ਨਾਲ ਨਜਿੱਠਣ ਲਈ ਭਾਰਤ ਸਰਕਾਰ ਨੇ ਇੱਕ ਵੱਡੀ ਰਣਨੀਤੀ ਤਿਆਰ ਕੀਤੀ ਹੈ। ਕੇਂਦਰ ਸਰਕਾਰ ਨੇ ਹੁਣ ਆਪਣੀ ਨਿਰਭਰਤਾ ਸਿਰਫ਼ ਖਾੜੀ ਦੇਸ਼ਾਂ ‘ਤੇ ਰੱਖਣ ਦੀ ਬਜਾਏ ਅਮਰੀਕਾ, ਨਾਰਵੇ, ਕੈਨੇਡਾ ਅਤੇ ਰੂਸ ਵਰਗੇ ਨਵੇਂ ਸਰੋਤਾਂ ਤੋਂ LPG ਦੀ ਖੇਪ ਮੰਗਵਾਉਣੀ ਸ਼ੁਰੂ ਕਰ ਦਿੱਤੀ ਹੈ। ਇਸ ਦੇ ਨਾਲ ਹੀ, ਖਾੜੀ ਖੇਤਰ ਦੇ ਉਨ੍ਹਾਂ ਹਿੱਸਿਆਂ ਤੋਂ ਵੀ ਖਰੀਦ ਜਾਰੀ ਹੈ ਜਿੱਥੇ ਸਪਲਾਈ ਉਪਲਬਧ ਹੈ। ਕੇਂਦਰੀ ਪੈਟਰੋਲੀਅਮ ਮੰਤਰੀ ਹਰਦੀਪ ਸਿੰਘ ਪੁਰੀ ਨੇ ਵੀਰਵਾਰ ਨੂੰ ਸੰਸਦ ਵਿੱਚ ਇਹ ਮਹੱਤਵਪੂਰਨ ਜਾਣਕਾਰੀ ਸਾਂਝੀ ਕੀਤੀ।

ਹੋਟਲਾਂ ਅਤੇ ਰੈਸਟੋਰੈਂਟਾਂ ਨੂੰ ਬਦਲਵੇਂ ਬਾਲਣ ਦੀ ਵਰਤੋਂ ਦੀ ਸਲਾਹ

ਦੁਨੀਆ ਦਾ ਦੂਜਾ ਸਭ ਤੋਂ ਵੱਡਾ LPG ਆਯਾਤਕ ਹੋਣ ਦੇ ਨਾਤੇ, ਭਾਰਤ ਇਸ ਸਮੇਂ ਸੀਮਤ ਸਪਲਾਈ ਦੀ ਚੁਣੌਤੀ ਦਾ ਸਾਹਮਣਾ ਕਰ ਰਿਹਾ ਹੈ। ਕੇਂਦਰੀ ਮੰਤਰੀ ਨੇ ਦੱਸਿਆ ਕਿ ਵਾਤਾਵਰਣ ਮੰਤਰਾਲੇ ਨੇ ਰਾਜ ਪ੍ਰਦੂਸ਼ਣ ਕੰਟਰੋਲ ਬੋਰਡਾਂ ਨੂੰ ਅਪੀਲ ਕੀਤੀ ਹੈ ਕਿ ਹੋਟਲ ਅਤੇ ਰੈਸਟੋਰੈਂਟ ਸੈਕਟਰ ਨੂੰ ਇੱਕ ਮਹੀਨੇ ਲਈ ਬਾਇਓਮਾਸ, ਮਿੱਟੀ ਦਾ ਤੇਲ ਅਤੇ ਕੋਲੇ ਵਰਗੇ ਬਦਲਵੇਂ ਬਾਲਣਾਂ ਦੀ ਵਰਤੋਂ ਕਰਨ ਦੀ ਇਜਾਜ਼ਤ ਦਿੱਤੀ ਜਾਵੇ। ਇਸ ਕਦਮ ਦਾ ਮੁੱਖ ਉਦੇਸ਼ LPG ਦੀ ਖਪਤ ਨੂੰ ਘਟਾਉਣਾ ਹੈ ਤਾਂ ਜੋ ਘਰੇਲੂ ਲੋੜਾਂ ਨੂੰ ਪੂਰਾ ਕੀਤਾ ਜਾ ਸਕੇ।

ਖਾੜੀ ਦੇਸ਼ਾਂ ‘ਤੇ ਘਟਾਈ ਨਿਰਭਰਤਾ, ਘਰੇਲੂ ਸਪਲਾਈ ਸੁਰੱਖਿਅਤ

ਹਰਦੀਪ ਸਿੰਘ ਪੁਰੀ ਨੇ ਦੱਸਿਆ ਕਿ ਪਹਿਲਾਂ ਭਾਰਤ ਆਪਣੀ LPG ਲੋੜ ਦਾ ਲਗਭਗ 60% ਹਿੱਸਾ ਖਾੜੀ ਦੇਸ਼ਾਂ ਤੋਂ ਮੰਗਵਾਉਂਦਾ ਸੀ, ਪਰ ਹੁਣ ਖਰੀਦ ਦੇ ਸਰੋਤਾਂ ਦਾ ਘੇਰਾ ਵਿਸ਼ਾਲ ਕਰ ਦਿੱਤਾ ਗਿਆ ਹੈ। ਸਰਕਾਰ ਨੇ ਆਪਣੀਆਂ ਐਮਰਜੈਂਸੀ ਸ਼ਕਤੀਆਂ ਦੀ ਵਰਤੋਂ ਕਰਦੇ ਹੋਏ ਰਿਫਾਈਨਰੀਆਂ ਨੂੰ LPG ਉਤਪਾਦਨ ਵਧਾਉਣ ਅਤੇ ਉਦਯੋਗਾਂ ਨੂੰ ਹੋਣ ਵਾਲੀ ਵਿਕਰੀ ਘਟਾਉਣ ਦੇ ਹੁਕਮ ਦਿੱਤੇ ਹਨ। ਇਸ ਨਾਲ ਦੇਸ਼ ਦੇ ਕਰੀਬ 33.3 ਕਰੋੜ ਘਰਾਂ ਨੂੰ ਗੈਸ ਦੀ ਕਿੱਲਤ ਨਹੀਂ ਆਵੇਗੀ। ਉਨ੍ਹਾਂ ਭਰੋਸਾ ਦਿੱਤਾ ਕਿ ਘਰੇਲੂ LPG ਸਪਲਾਈ ਪੂਰੀ ਤਰ੍ਹਾਂ ਸੁਰੱਖਿਅਤ ਹੈ ਅਤੇ ਸਿਲੰਡਰਾਂ ਦੀ ਡਿਲਿਵਰੀ ਦਾ ਚੱਕਰ ਵੀ ਪਹਿਲਾਂ ਵਾਂਗ ਹੀ ਚੱਲ ਰਿਹਾ ਹੈ।

ਹੋਲਮੂਜ਼ ਦੇ ਜਲਡਮਰੂ ਮੱਧ ਦਾ ਪ੍ਰਭਾਵ

ਇਜ਼ਰਾਈਲ-ਈਰਾਨ ਜੰਗ ਕਾਰਨ ਸਟ੍ਰੇਟ ਆਫ ਹੋਰਮੂਜ਼ ਵਿੱਚ ਜਹਾਜ਼ਾਂ ਦੀ ਆਵਾਜਾਈ ਪ੍ਰਭਾਵਿਤ ਹੋਈ ਹੈ, ਜਿਸ ਦਾ ਅਸਰ ਭਾਰਤ ਦੀ ਕੱਚੇ ਤੇਲ ਅਤੇ LNG ਸਪਲਾਈ ‘ਤੇ ਵੀ ਪਿਆ ਹੈ। ਹਾਲਾਂਕਿ, ਮੰਤਰੀ ਨੇ ਸਪੱਸ਼ਟ ਕੀਤਾ ਕਿ ਹੁਣ ਭਾਰਤ ਦੇ ਕੁੱਲ ਤੇਲ ਆਯਾਤ ਦਾ 70% ਹਿੱਸਾ ਹੋਰਮੂਜ਼ ਤੋਂ ਬਾਹਰਲੇ ਖੇਤਰਾਂ ਤੋਂ ਆ ਰਿਹਾ ਹੈ, ਜੋ ਕਿ ਇੱਕ ਰਾਹਤ ਦੀ ਖ਼ਬਰ ਹੈ। ਪੈਟਰੋਲ ਅਤੇ ਡੀਜ਼ਲ ਦੀ ਉਪਲਬਧਤਾ ਵੀ ਪੂਰੀ ਤਰ੍ਹਾਂ ਸੁਰੱਖਿਅਤ ਹੈ।

ਕਾਲਾਬਾਜ਼ਾਰੀ ਰੋਕਣ ਲਈ ਠੋਸ ਕਦਮ

ਗੈਸ ਦੀ ਕਮੀ ਦੇ ਡਰ ਕਾਰਨ ਹੋਣ ਵਾਲੀ ਜਮ੍ਹਾਖੋਰੀ ਅਤੇ ਕਾਲਾਬਾਜ਼ਾਰੀ ਨੂੰ ਰੋਕਣ ਲਈ ਤੇਲ ਕੰਪਨੀਆਂ ਹੁਣ ਰਾਜ ਸਰਕਾਰਾਂ ਨਾਲ ਮਿਲ ਕੇ ਕੰਮ ਕਰਨਗੀਆਂ। ਵੀਰਵਾਰ ਤੋਂ ਔਸਤ ਮਾਸਿਕ ਵਪਾਰਕ LPG ਲੋੜ ਦਾ 20% ਹਿੱਸਾ ਵਿਸ਼ੇਸ਼ ਤੌਰ ‘ਤੇ ਅਲਾਟ ਕੀਤਾ ਜਾਵੇਗਾ ਤਾਂ ਜੋ ਵਪਾਰਕ ਖੇਤਰ ਵਿੱਚ ਗੜਬੜੀ ਨੂੰ ਰੋਕਿਆ ਜਾ ਸਕੇ। ਪਿਛਲੇ ਸਾਲ ਭਾਰਤ ਨੇ 3.315 ਕਰੋੜ ਟਨ ਰਸੋਈ ਗੈਸ ਦੀ ਖਪਤ ਕੀਤੀ ਸੀ।

ਜੰਗ ਲੰਬੀ ਚੱਲੀ ਤਾਂ ਵੀ ਨਹੀਂ ਹੋਵੇਗੀ ਕਿੱਲਤ

ਕੇਂਦਰੀ ਮੰਤਰੀ ਨੇ ਕਿਹਾ ਕਿ ਜੇਕਰ ਮੱਧ ਪੂਰਬ ਵਿੱਚ ਜੰਗ ਲੰਬੇ ਸਮੇਂ ਤੱਕ ਜਾਰੀ ਰਹਿੰਦੀ ਹੈ, ਤਾਂ ਵੀ ਭਾਰਤ ਕੋਲ ਗੈਸ ਉਤਪਾਦਨ ਅਤੇ ਬਦਲਵੇਂ ਰੂਟਾਂ ਰਾਹੀਂ ਸਪਲਾਈ ਦੇ ਪੂਰੇ ਪ੍ਰਬੰਧ ਹਨ। ਦੇਸ਼ ਵਿੱਚ ਕੁਕਿੰਗ ਗੈਸ ਦੀ ਸਪਲਾਈ ਨੂੰ ਲੈ ਕੇ ਫੈਲੀ ਘਬਰਾਹਟ ਸਿਰਫ਼ ਚਿੰਤਾ ਦਾ ਨਤੀਜਾ ਹੈ, ਜਦਕਿ ਜ਼ਮੀਨੀ ਪੱਧਰ ‘ਤੇ ਸਰਕਾਰ ਨੇ ਸਥਿਤੀ ਨੂੰ ਪੂਰੀ ਤਰ੍ਹਾਂ ਸੰਭਾਲ ਲਿਆ ਹੈ।