ਦੇਸ਼ ‘ਚ ਇਲੈਕਟ੍ਰਿਕ ਕਾਰਾਂ ਦੀ ਮੰਗ 44% ਵਧੀ, ਮਹਿੰਦਰਾ ਨੇ ਲਗਾਈ ਵੱਡੀ ਛਾਲ; ਟਾਟਾ ਮੋਟਰਜ਼ ਰਹੀ ਟੌਪਰ

ਦੇਸ਼ 'ਚ 44% ਵਧੀ ਇਲੈਕਟ੍ਰਿਕ ਕਾਰਾਂ ਦੀ ਮੰਗ, ਮਹਿੰਦਰਾ ਤੇ ਟਾਟਾ ਦਾ ਦਬਦਬਾ

ਭਾਰਤੀ ਆਟੋਮੋਬਾਈਲ ਬਾਜ਼ਾਰ ਵਿੱਚ ਇਲੈਕਟ੍ਰਿਕ ਵਾਹਨਾਂ (EV) ਦੀ ਮੰਗ ਲਗਾਤਾਰ ਵਧ ਰਹੀ ਹੈ। ਆਟੋ ਡੀਲਰਾਂ ਦੀ ਪ੍ਰਮੁੱਖ ਸੰਸਥਾ ‘ਫੈਡਰੇਸ਼ਨ ਆਫ ਆਟੋਮੋਬਾਈਲ ਡੀਲਰਜ਼ ਐਸੋਸੀਏਸ਼ਨ’ (FADA) ਵੱਲੋਂ ਜਾਰੀ ਤਾਜ਼ਾ ਅੰਕੜਿਆਂ ਅਨੁਸਾਰ, ਫਰਵਰੀ 2026 ਵਿੱਚ ਇਲੈਕਟ੍ਰਿਕ ਕਾਰਾਂ ਦੀ ਵਿਕਰੀ ਸਾਲਾਨਾ ਆਧਾਰ ‘ਤੇ 44% ਵਧ ਕੇ 13,733 ਯੂਨਿਟ ਤੱਕ ਪਹੁੰਚ ਗਈ ਹੈ।

ਹਾਲਾਂਕਿ, ਜੇਕਰ ਇਸ ਦੀ ਤੁਲਨਾ ਪਿਛਲੇ ਮਹੀਨੇ ਯਾਨੀ ਜਨਵਰੀ 2026 ਨਾਲ ਕੀਤੀ ਜਾਵੇ, ਤਾਂ ਵਿਕਰੀ ਵਿੱਚ 25.65% ਦੀ ਗਿਰਾਵਟ ਦਰਜ ਕੀਤੀ ਗਈ ਹੈ। ਜਨਵਰੀ ਵਿੱਚ 18,470 ਯੂਨਿਟਾਂ ਦੀ ਵਿਕਰੀ ਹੋਈ ਸੀ। ਮਾਹਰਾਂ ਦਾ ਮੰਨਣਾ ਹੈ ਕਿ ਜਨਵਰੀ ਦੇ ਉਤਸ਼ਾਹ ਤੋਂ ਬਾਅਦ ਫਰਵਰੀ ਵਿੱਚ ਅਕਸਰ ਮੰਗ ਵਿੱਚ ਕੁਝ ਸੁਸਤੀ ਦੇਖਣ ਨੂੰ ਮਿਲਦੀ ਹੈ।

ਟਾਟਾ ਮੋਟਰਜ਼ ਦਾ ਦਬਦਬਾ ਬਰਕਰਾਰ

ਇਲੈਕਟ੍ਰਿਕ ਪੈਸੰਜਰ ਵਹੀਕਲ (PV) ਸੈਗਮੈਂਟ ਵਿੱਚ ਟਾਟਾ ਮੋਟਰਜ਼ ਅਜੇ ਵੀ ਪਹਿਲੇ ਨੰਬਰ ‘ਤੇ ਕਾਬਜ਼ ਹੈ। ਫਰਵਰੀ 2026 ਵਿੱਚ ਕੰਪਨੀ ਨੇ 5,568 ਯੂਨਿਟਾਂ ਦੀ ਵਿਕਰੀ ਕੀਤੀ, ਜੋ ਕਿ ਫਰਵਰੀ 2025 ਦੀਆਂ 4,020 ਯੂਨਿਟਾਂ ਦੇ ਮੁਕਾਬਲੇ 38.51% ਜ਼ਿਆਦਾ ਹੈ। ਹਾਲਾਂਕਿ, ਟਾਟਾ ਦੀ ਵਿਕਰੀ ਵੀ ਜਨਵਰੀ ਦੀਆਂ 8,007 ਯੂਨਿਟਾਂ ਦੇ ਮੁਕਾਬਲੇ 30.46% ਘੱਟ ਰਹੀ ਹੈ। ਦੂਜੇ ਪਾਸੇ, JSW MG Motor 3,312 ਯੂਨਿਟਾਂ ਦੀ ਵਿਕਰੀ ਨਾਲ ਦੂਜੇ ਸਥਾਨ ‘ਤੇ ਰਹੀ, ਪਰ ਇਸ ਦੀ ਵਿਕਰੀ ਵਿੱਚ ਪਿਛਲੇ ਸਾਲ ਦੇ ਮੁਕਾਬਲੇ 5.10% ਦੀ ਕਮੀ ਆਈ ਹੈ।

ਮਹਿੰਦਰਾ ਦੀ ਵਿਕਰੀ ‘ਚ ਇਤਿਹਾਸਕ ਉਛਾਲ

ਵੱਡੀਆਂ ਕੰਪਨੀਆਂ ਵਿੱਚੋਂ ਮਹਿੰਦਰਾ ਨੇ ਸਭ ਤੋਂ ਸ਼ਾਨਦਾਰ ਸਾਲਾਨਾ ਵਾਧਾ ਦਰਜ ਕੀਤਾ ਹੈ। ਫਰਵਰੀ 2026 ਵਿੱਚ ਮਹਿੰਦਰਾ ਦੀ ਇਲੈਕਟ੍ਰਿਕ PV ਵਿਕਰੀ 2,913 ਯੂਨਿਟ ਰਹੀ, ਜੋ ਕਿ ਫਰਵਰੀ 2025 ਵਿੱਚ ਮਹਿਜ਼ 508 ਯੂਨਿਟ ਸੀ। ਇਸ ਤਰ੍ਹਾਂ ਕੰਪਨੀ ਨੇ 473.43% ਦਾ ਭਾਰੀ ਉਛਾਲ ਦਰਜ ਕੀਤਾ ਹੈ। ਹਾਲਾਂਕਿ, ਮਹੀਨਾਵਾਰ ਆਧਾਰ ‘ਤੇ ਜਨਵਰੀ ਦੀਆਂ 3,668 ਯੂਨਿਟਾਂ ਦੇ ਮੁਕਾਬਲੇ ਵਿਕਰੀ ਵਿੱਚ 20.58% ਦੀ ਗਿਰਾਵਟ ਦੇਖੀ ਗਈ।

ਹਰ ਸੇਗਮੇਂਟ ਵਿੱਚ ਵਿਕਰੀ ਵਧੀ

FADA ਦੇ ਅਨੁਸਾਰ, ਫਰਵਰੀ 2026 ਵਿੱਚ ਹਰ ਸੇਗਮੇਂਟ ਵਿੱਚ ਇਲੈਕਟ੍ਰਿਕ ਵਾਹਨਾਂ ਦੀ ਵਿਕਰੀ ਸਾਲ-ਦਰ-ਸਾਲ ਵਧੀ। ਹਾਲਾਂਕਿ, ਕੁੱਲ EV ਹਿੱਸੇ ਵਿੱਚ ਕੋਈ ਖਾਸ ਵਾਧਾ ਨਹੀਂ ਹੋਇਆ, ਕਿਉਂਕਿ ਪੈਟਰੋਲ-ਡੀਜ਼ਲ (ICE) ਵਾਹਨਾਂ ਦੀ ਵਿਕਰੀ ਤੇਜ਼ੀ ਨਾਲ ਵਧ ਰਹੀ ਹੈ। ਕੁਝ EV ਸ਼੍ਰੇਣੀਆਂ ਵਿੱਚ ਮਹੀਨਾ-ਦਰ-ਮਹੀਨਾ ਗਿਰਾਵਟ ਜਨਵਰੀ ਵਿੱਚ ਛੋਟਾ ਮਹੀਨਾ ਅਤੇ ਵੱਧ ਵਿਕਰੀ ਦੇ ਕਾਰਨ ਹੈ। ਹੋਰ ਕੰਪਨੀਆਂ ਵਿੱਚ, ਵੀਅਤਨਾਮੀ ਕਾਰ ਨਿਰਮਾਤਾ VinFast ਨੇ ਫਰਵਰੀ ਵਿੱਚ 384 ਯੂਨਿਟ ਵੇਚੇ, ਜਦੋਂ ਕਿ ਚੀਨ ਦੀ BYD ਨੇ 306 ਯੂਨਿਟ ਵੇਚੇ। BYD ਦੀ ਵਿਕਰੀ ਸਾਲ-ਦਰ-ਸਾਲ 10.07% ਅਤੇ ਮਹੀਨਾ-ਦਰ-ਮਹੀਨਾ 32.47% ਵਧੀ।

ਮਾਰੂਤੀ ਨੇ ਵੇਚੀਆਂ ਇੰਨੀਆਂ ਕਾਰਾਂ

ਇਸ ਤੋਂ ਇਲਾਵਾ, ਹੁੰਡਈ ਨੇ ਫਰਵਰੀ ਵਿੱਚ 304 ਇਲੈਕਟ੍ਰਿਕ ਕਾਰਾਂ ਵੇਚੀਆਂ, ਜੋ ਕਿ ਫਰਵਰੀ 2025 ਵਿੱਚ 775 ਯੂਨਿਟਾਂ ਤੋਂ 60.77% ਘੱਟ ਹੈ। KIA ਦੀ ਵਿਕਰੀ ਵਿੱਚ ਸਾਲ-ਦਰ-ਸਾਲ ਭਾਰੀ ਵਾਧਾ ਹੋਇਆ। ਕੰਪਨੀ ਨੇ ਫਰਵਰੀ ਵਿੱਚ 295 ਯੂਨਿਟ ਵੇਚੇ, ਜਦੋਂ ਕਿ ਪਿਛਲੇ ਸਾਲ ਇਸੇ ਮਹੀਨੇ ਵਿੱਚ ਸਿਰਫ਼ 22 ਯੂਨਿਟ ਸਨ। ਲਗਜ਼ਰੀ ਇਲੈਕਟ੍ਰਿਕ ਕਾਰ ਸੈਗਮੈਂਟ ਵਿੱਚ, BMW ਨੇ ਫਰਵਰੀ ਵਿੱਚ 245 ਯੂਨਿਟ ਅਤੇ ਮਰਸੀਡੀਜ਼ ਨੇ 65 ਯੂਨਿਟ ਵੇਚੇ। ਮਾਰੂਤੀ ਨੇ 214 ਯੂਨਿਟ, ਟੇਸਲਾ ਨੇ 29 ਯੂਨਿਟ ਅਤੇ ਵੋਲਵੋ ਨੇ 25 ਇਲੈਕਟ੍ਰਿਕ ਕਾਰਾਂ ਵੇਚੀਆਂ।