ਹਸਪਤਾਲ ‘ਚ ਪਰਦਾ ਲਗਾ ਬਜ਼ੁਰਗ ਮਰੀਜ਼ ਨੂੰ ਬੇਰਹਿਮੀ ਨਾਲ ਕੁੱਟਿਆ, ਸਟਾਫ਼ ਦੀਆਂ ਕਰਤੂਤਾਂ CCTV ‘ਚ ਕੈਦ

ਵਾਇਰਲ ਵੀਡੀਓ (Pic Source: X/@Sudanshutrivedi)

ਸੋਸ਼ਲ ਮੀਡੀਆ ‘ਤੇ ਇਕ ਬਹੁਤ ਹੀ ਹੈਰਾਨ ਕਰਨ ਵਾਲਾ ਵੀਡੀਓ ਸਾਹਮਣੇ ਆਇਆ ਹੈ, ਜਿਸ ਨੂੰ ਦੇਖ ਕੇ ਲੋਕ ਗੁੱਸੇ ‘ਚ ਹਨ। ਇਸ ਵਿੱਚ ਹਸਪਤਾਲ ਦਾ ਇੱਕ ਕਰਮਚਾਰੀ ਬੈੱਡ ਉੱਤੇ ਪਏ ਇੱਕ ਬਜ਼ੁਰਗ ਮਰੀਜ਼ ਨੂੰ ਬੇਰਹਿਮੀ ਨਾਲ ਕੁੱਟਦਾ ਨਜ਼ਰ ਆ ਰਿਹਾ ਹੈ। ਵੀਡੀਓ ‘ਚ ਕਰਮਚਾਰੀ ਨੂੰ ਆਪਣੀ ਕੂਹਣੀ ਨਾਲ ਮਰੀਜ਼ ਦੇ ਪੇਟ ‘ਤੇ ਵਾਰ ਕਰਦੇ ਦੇਖਿਆ ਜਾ ਸਕਦਾ ਹੈ। ਇਸ ਘਟਨਾ ਤੋਂ ਗੁੱਸੇ ਵਿੱਚ ਆਏ ਲੋਕਾਂ ਨੇ ਮੁਲਜ਼ਮਾਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ ਹੈ।

ਮਾਈਕ੍ਰੋ ਬਲਾਗਿੰਗ ਸਾਈਟ ਐਕਸ ‘ਤੇ ਵੀਡੀਓ ਸ਼ੇਅਰ ਕਰਕੇ ਪ੍ਰੋਫੈਸਰ ਸੁਧਾਂਸ਼ੂ ਤ੍ਰਿਵੇਦੀ ਨਾਂ ਦੇ ਯੂਜ਼ਰ ਨੇ ਦਾਅਵਾ ਕੀਤਾ ਕਿ ਦੋਸ਼ੀ ਡਾਕਟਰ ਹੈ। ਉਸ ਨੇ ਲਿਖਿਆ ਹੈ, ‘ਲੋਕਾਂ ਨੇ ਡਾਕਟਰ ਨੂੰ ਰੱਬ ਦਾ ਦਰਜਾ ਦਿੱਤਾ ਹੈ, ਪਰ ਇੱਥੇ ਤਾਂ ਡਾਕਟਰ ਸ਼ੈਤਾਨ ਦੇ ਰੂਪ ‘ਚ ਹੈ, ਉਂਝ ਲੋਕਾਂ ਦਾ ਮੰਨਣਾ ਹੈ ਕਿ ਦੋਸ਼ੀ ਡਾਕਟਰ ਨਹੀਂ, ਸਗੋਂ ਵਾਰਡ ਬੁਆਏ ਜਾਂ ਹੋਰ ਸਟਾਫ ਹੈ।’ . ਪਰ ਇਸ 20 ਸੈਕਿੰਡ ਦੀ ਕਲਿੱਪ ਨੇ ਸਭ ਨੂੰ ਹੈਰਾਨ ਕਰ ਦਿੱਤਾ ਹੈ। ਲੋਕ ਕਹਿ ਰਹੇ ਹਨ ਕਿ ਆਪਣੇ ਮਰੀਜ਼ ਨੂੰ ਕਦੇ ਵੀ ਇਕੱਲਾ ਨਾ ਛੱਡੋ।

ਵਾਇਰਲ ਹੋ ਰਹੀ ਵੀਡੀਓ ‘ਚ ਹਸਪਤਾਲ ਦੇ ਕਰਮਚਾਰੀ ਨੂੰ ਪਹਿਲਾਂ ਮਰੀਜ਼ ਦੇ ਬੈੱਡ ਦੇ ਨੇੜੇ ਪਰਦਾ ਹਟਾਉਂਦੇ ਅਤੇ ਫਿਰ ਉਸ ਨੂੰ ਲਗਾਉਂਦੇ ਦੇਖਿਆ ਜਾ ਸਕਦਾ ਹੈ। ਇਸ ਤੋਂ ਬਾਅਦ ਉਹ ਆਪਣੀ ਕੂਹਣੀ ਨਾਲ ਮਰੀਜ਼ ਦੇ ਪੇਟ ‘ਤੇ ਵਾਰ ਕਰਨਾ ਸ਼ੁਰੂ ਕਰ ਦਿੰਦਾ ਹੈ। ਵੀਡੀਓ ‘ਚ ਤੁਸੀਂ ਦੇਖ ਸਕਦੇ ਹੋ ਕਿ ਮਰੀਜ਼ ਬੇਵੱਸ ਹੋ ਕੇ ਸੱਟਾਂ ਨੂੰ ਸਹਿ ਰਿਹਾ ਹੈ। ਸ਼ੁਕਰ ਹੈ ਕਿ ਮੁਲਾਜ਼ਮ ਦੀ ਇਹ ਹਰਕਤ ਉਥੇ ਲੱਗੇ ਸੀਸੀਟੀਵੀ ਕੈਮਰਿਆਂ ਵਿਚ ਕੈਦ ਹੋ ਗਈ, ਨਹੀਂ ਤਾਂ ਇਸ ਘਟਨਾ ‘ਤੇ ਕਿਸੇ ਨੂੰ ਯਕੀਨ ਨਹੀਂ ਹੁੰਦਾ। ਹਾਲਾਂਕਿ ਜਿਵੇਂ ਹੀ ਵਿਅਕਤੀ ਦੀ ਨਜ਼ਰ ਕੈਮਰੇ ‘ਤੇ ਪਈ ਤਾਂ ਉਹ ਮੌਕੇ ਤੋਂ ਭੱਜ ਗਿਆ।

ਸੀਸੀਟੀਵੀ ਫੁਟੇਜ ਮੁਤਾਬਕ ਇਹ ਘਟਨਾ 19 ਜੂਨ ਬੁੱਧਵਾਰ ਦੀ ਹੈ। ਹਾਲਾਂਕਿ, ਘਟਨਾ ਦਾ ਸਹੀ ਸਥਾਨ ਅਣਜਾਣ ਹੈ ਅਤੇ ਮਰੀਜ਼ ਨਾਲ ਬੇਰਹਿਮੀ ਨਾਲ ਵਿਵਹਾਰ ਕਰਨ ਵਾਲੇ ਵਿਅਕਤੀ ਦੀ ਪਛਾਣ ਨਹੀਂ ਹੋ ਸਕੀ ਹੈ। ਮਰੀਜ਼ ਨਾਲ ਸਟਾਫ਼ ਦੀ ਅਣਮਨੁੱਖੀ ਹਰਕਤ ਦਾ ਇਹ ਵੀਡੀਓ ਸੋਸ਼ਲ ਮੀਡੀਆ ‘ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਿਹਾ ਹੈ। ਲੋਕਾਂ ਨੇ ਦੋਸ਼ੀ ਸਟਾਫ ਖਿਲਾਫ ਸਖਤ ਕਾਰਵਾਈ ਦੀ ਮੰਗ ਕੀਤੀ ਹੈ।

ਇੱਕ ਯੂਜ਼ਰ ਨੇ ਕਮੈਂਟ ਕੀਤਾ ਹੈ, ਅਜਿਹੇ ਲੋਕ ਡਾਕਟਰ ਨਹੀਂ ਸਗੋਂ ਸ਼ੈਤਾਨ ਕਹਾਉਣ ਦੇ ਹੱਕਦਾਰ ਹਨ। ਉਥੇ ਹੀ ਇਕ ਹੋਰ ਯੂਜ਼ਰ ਦਾ ਕਹਿਣਾ ਹੈ ਕਿ ਇਹ ਡਾਕਟਰ ਨਹੀਂ ਸਗੋਂ ਨਰਸਿੰਗ ਸਟਾਫ ਹੈ। ਪਰ ਜੋ ਵੀ ਉਸਨੇ ਕੀਤਾ ਉਸਨੂੰ ਬਰਦਾਸ਼ਤ ਨਹੀਂ ਕੀਤਾ ਜਾ ਸਕਦਾ। ਇੱਕ ਹੋਰ ਯੂਜ਼ਰ ਨੇ ਕਮੈਂਟ ਕੀਤਾ ਹੈ, ਡਾਕਟਰਾਂ ਬਾਰੇ ਝੂਠ ਫੈਲਾਉਣਾ ਬੰਦ ਕਰੋ। ਉਹ ਵਾਰਡ ਬੁਆਏ ਹੈ। ਇਕ ਹੋਰ ਯੂਜ਼ਰ ਨੇ ਲਿਖਿਆ, ਇਹ ਵਿਅਕਤੀ ਜੋ ਵੀ ਹੈ, ਉਸ ਨੂੰ ਛੱਡਿਆ ਨਹੀਂ ਜਾਣਾ ਚਾਹੀਦਾ।