ਪਠਾਨਕੋਟ ‘ਚ ਅੱਜ 8 ਘੰਟੇ ਬਿਜਲੀ ਦਾ ਕੱਟ, ਗਰਮੀਆਂ ਦੀ ਸੀਜ਼ਨ ‘ਚ ਮੁਰੰਮਤ ਦੇ ਚਲਦੇ ਸਪਲਾਈ ਰਹੇਗੀ ਬੰਦ

ਸੰਕੇਤਕ ਤਸਵੀਰ

ਤੇਜ਼ ਗਰਮੀ ਦਾ ਮੌਸਮ ਸ਼ੁਰੂ ਹੁੰਦੇ ਹੀ ਪਾਵਰ ਗ੍ਰਿਡ ਤੇ ਹੋਰ ਬਿਜਲੀ ਨਾਲ ਜੁੜੀਆਂ ਮੁਰੰਮਤ ਦੀ ਜ਼ਰੂਰਤ ਵੱਧ ਗਈ ਹੈ। ਇਸ ਸਿਲਸਿਲੇ ‘ਚ ਮੰਗਲਵਾਰ, ਯਾਨੀ ਕਿ ਅੱਜ ਪਠਾਨਕੋਟ ਸ਼ਹਿਰ ਦੇ ਨਾਲ-ਨਾਲ ਜ਼ਿਲ੍ਹੇ ਦੇ ਕਈ ਇਲਾਕਿਆਂ ‘ਚ 8 ਘੰਟੇ ਦਾ ਲੰਬਾ ਬਿਜਲੀ ਦਾ ਕੱਟ ਲੱਗਣ ਜਾ ਰਿਹਾ ਹੈ। ਜਾਣਕਾਰੀ ਮੁਤਾਬਕ 66 ਕੇਵੀ ਰਾਣੀਪੁਰ, ਡੇਅਰੀਵਾਲ, ਤਾਰਾਗੜ੍ਹ, ਨਰੋਟ ਜੈਮਲ ਸਿੰਘ ਤੇ ਸੁਜਾਨਪੁਰ ਤੋਂ ਚੱਲਣ ਵਾਲੇ ਸਾਰੇ ਹੀ ਫੀਡਰ ਸਵੇਰ 9 ਵਜੇ ਤੋਂ ਸ਼ਾਮ 5 ਵਜੇ ਤੱਕ ਬੰਦ ਰਹਿਣਗੇ।

ਉੱਥੇ ਹੀ, ਸ਼ਹਿਰੀ ਇਲਾਕਿਆਂ ਦੀ ਗੱਲ ਕਰੀਏ ਤਾਂ 11 ਕੇਵੀ ਅਨੰਦਪੁਰ ਫੀਡਰ ਤੇ 11 ਕੇਵੀ ਅਬਰੋਲ ਨਗਰ ਫੀਡਰ ਦੀ ਸਪਲਾਈ ਵੀ 9 ਤੋਂ 5 ਵਜੇ ਤੱਕ ਬੰਦ ਰਹੇਗੀ। ਇਸ ਦੀ ਜਾਣਕਾਰੀ ਐਸਡੀਓ ਉੱਤਰੀ ਪਠਾਨਕੋਟ ਜਤਿੰਦਰ ਸ਼ਰਮਾ ਨੇ ਦਿੱਤੀ ਹੈ।

ਸਹਾਇਕ ਇੰਜੀਨੀਅਰ ਮਨਦੀਪ ਸੈਣੀ ਨੇ ਦੱਸਿਆ ਕਿ 11 ਕੇਵੀ ਪ੍ਰੀਤਪੁਰ ਫੀਡਰ ਤੇ 11 ਕੇਵੀ ਟੈਲੀਫੋਨ ਐਕਸਚੇਂਜ, ਸੀਟੀ ਫੀਡਰ, ਸੈਲੀ ਰੋਡ ਫੀਡਰ ਦੀ ਸਪਲਾਈ ਸਵੇਰ 10 ਵਜੇ ਤੋਂ ਸ਼ਾਮ 8 ਵਜੇ ਤੱਕ ਪ੍ਰਭਾਵਿਤ ਰਹੇਗੀ। ਪਾਵਰਕਾਮ ਉਪ ਮੰਡਲ ਸੁਜਾਨਪੁਰ ਦੇ ਅਧੀਨ ਆਉਂਦੇ 66 ਕੇਵੀ ਫੀਡਰਾਂ ਦੀ ਸਾਂਭ-ਸੰਭਾਲ ਦੇ ਚੱਲਦੇ ਮੰਗਲਵਾਰ ਨੂੰ ਬਿਜਲੀ ਬੰਦ ਰਹੇਗੀ।

ਐਸਡੀਓ ਉੱਤਰੀ ਪਠਾਨਕੋਟ ਜਤਿੰਦਰ ਸ਼ਰਮਾ ਨੇ ਦੱਸਿਆ ਕਿ ਬਿਜਲੀ ਕੱਟ ਦੇ ਚੱਲਦੇ ਉਨ੍ਹਾਂ ਦੇ ਅਧੀਨ ਦਫ਼ਤਰ ਦੇ ਸਾਰੇ ਹੀ ਖਪਤਕਾਰਾਂ ਨੂੰ ਬੇਨਤੀ ਹੈ ਕਿ ਉਹ ਆਪਣੇ ਕੰਮਾਂ ਦਾ ਵਿਕਲਪ ਪ੍ਰਬੰਧ ਕਰ ਲੈਣ ਤਾਂ ਜੋ ਲੋਕਾਂ ਨੂੰ ਪਰੇਸ਼ਾਨੀ ਨਾਲ ਝੱਲਣੀ ਪਏ।