ਟ੍ਰੇਨ ਚ ਯਾਤਰੀ ਨੂੰ ਪਿਆ ਦੌਰਾ, ਡਾਕਟਰ ਨੇ ਮਹਿਜ਼ 47 ਸਕਿੰਟਾਂ ਚ ਹੀ ਕੀਤਾ ਠੀਕ

ਸੰਕੇਤਕ ਤਸਵੀਰ

ਅੰਮ੍ਰਿਤਸਰ-ਅਜਮੇਰ ਐਕਸਪ੍ਰੈਸ ਵਿੱਚ ਬੁੱਧਵਾਰ ਨੂੰ ਇੱਕ ਵਿਅਕਤੀ ਨੂੰ ਦਿਲ ਦਾ ਦੌਰਾ ਪੈ ਗਿਆ। ਜਿਸ ਕਾਰਨ ਉਸ ਦੀ ਹਾਲਤ ਵਿਗੜਨ ਕਾਰਨ ਉਸਦਾ ਸਾਹ ਰੁਕ ਗਿਆ ਸੀ। ਸਿਰਫ਼ ਗਰਦਨ ਅਤੇ ਹੱਥਾਂ ਦੀ ਨਬਜ਼ ਹੀ ਕੰਮ ਕਰ ਰਹੀ ਸੀ। ਫਿਰ ਟ੍ਰੇਨ ਵਿੱਚ ਮੌਜੂਦ ਇੱਕ ਮਹਿਲਾ ਯਾਤਰੀ ਡਾਕਟਰ ਨੇ ਬਿਨਾਂ ਕਿਸੇ ਦੇਰੀ ਦੇ ਤੁਰੰਤ ਮਰੀਜ਼ ਨੂੰ ਸੀਪੀਆਰ ਦੇਣਾ ਸ਼ੁਰੂ ਕਰ ਦਿੱਤਾ।

35 ਸੈਕਿੰਡ ਤੱਕ ਸੀਪੀਆਰ ਦੇਣ ਤੋਂ ਬਾਅਦ ਮਰੀਜ਼ ਦੇ ਹੱਥ-ਪੈਰ ਹਿੱਲਣ ਲੱਗੇ। 12 ਹੋਰ ਸੈਕਿੰਡ ਦੀ ਸੀਪੀਆਰ ਦਿੱਤੀ ਗਈ ਜਿਸ ਤੋਂ ਬਾਅਦ ਮਰੀਜ਼ ਉੱਠ ਕੇ ਬੈਠ ਗਿਆ। ਕੁਝ ਦੂਰੀ ‘ਤੇ ਰੇਵਾੜੀ ਸਟੇਸ਼ਨ ‘ਤੇ ਮਰੀਜ਼ ਨੂੰ ਐਂਬੂਲੈਂਸ ਰਾਹੀਂ ਬਿਨਾਂ ਕਿਸੇ ਦੇਰੀ ਦੇ ਹਸਪਤਾਲ ਪਹੁੰਚਾਇਆ ਗਿਆ। ਜਿੱਥੇ ਹੁਣ ਉਸ ਦੀ ਹਾਲਤ ਕੁਝ ਬਿਹਤਰ ਹੈ।

ਰੇਲ ਚ ਸਫ਼ਰ ਕਰ ਰਹੀ ਸੀ ਡਾਕਟਰ

ਜਾਣਕਾਰੀ ਅਨੁਸਾਰ ਸ੍ਰੀ ਬਾਲਾਜੀ ਸੇਵਾ ਸੰਘ ਦੀ ਅਗਵਾਈ ਹੇਠ ਸ਼ਰਧਾਲੂਆਂ ਦਾ ਜਥਾ ਅੰਮ੍ਰਿਤਸਰ-ਅਜਮੇਰ ਐਕਸਪ੍ਰੈਸ ਰਾਹੀਂ ਮਹਿੰਦੀਪੁਰ ਬਾਲਾਜੀ ਤੋਂ ਵਾਪਸ ਆ ਰਿਹਾ ਸੀ। ਇਸ ਡੱਬੇ ਵਿੱਚ ਕਪੂਰਥਲਾ ਦਾ ਸਵਾਮੀ ਪ੍ਰਸਾਦ ਆਪਣੇ ਪਰਿਵਾਰ ਸਮੇਤ ਖਾਟੂ ਸ਼ਿਆਮ ਦੇ ਦਰਸ਼ਨ ਕਰਕੇ ਵਾਪਸ ਆ ਰਿਹਾ ਸੀ।

ਜਦੋਂ ਟਰੇਨ ਚਰਖੀ ਦਾਦਰੀ ਪਹੁੰਚੀ ਤਾਂ ਸਵਾਮੀ ਪ੍ਰਸਾਦ ਬਾਥਰੂਮ ‘ਚ ਗਏ ਅਤੇ ਉਥੇ ਹੀ ਡਿੱਗ ਪਏ। ਇਸ ਤੋਂ ਬਾਅਦ ਪਰਿਵਾਰ ‘ਚ ਹਫੜਾ-ਦਫੜੀ ਮਚ ਗਈ। ਦੂਜੇ ਪਾਸੇ ਸ਼੍ਰੀ ਬਾਲਾਜੀ ਸੇਵਾ ਸੰਘ ਦੇ ਸ਼ਰਧਾਲੂਆਂ ਦੇ ਜਥੇ ਵਿੱਚ ਮਹਿਲਾ ਡਾਕਟਰ ਈਸ਼ਾ ਵੀ ਸ਼ਾਮਲ ਸੀ।

ਡਾਕਟਰ ਨੇ ਦਿੱਤੀ CPR

ਡਾਕਟਰ ਈਸ਼ਾ ਨੇ ਤੁਰੰਤ ਮਰੀਜ਼ ਕੋਲ ਪਹੁੰਚ ਕੇ ਉਸ ਦੀ ਜਾਂਚ ਕੀਤੀ। ਡਾਕਟਰ ਈਸ਼ਾ ਨੇ ਦੱਸਿਆ ਕਿ ਮਰੀਜ਼ ਦੇ ਨੱਕ ਨੇ ਸਾਹ ਲੈਣਾ ਬੰਦ ਕਰ ਦਿੱਤਾ ਸੀ। ਉਸਦੀ ਜੀਭ ਬਾਹਰ ਆ ਗਈ ਸੀ ਪਰ ਉਸਦੇ ਗਲੇ ਅਤੇ ਹੱਥਾਂ ਵਿੱਚ ਨਬਜ਼ ਕੰਮ ਕਰ ਰਹੀ ਸੀ। ਇਸ ਲਈ ਮੈਂ ਉਸਨੂੰ ਸੀ.ਪੀ.ਆਰ. ਦਿੱਤੀ। ਜਿਸ ਤੋਂ 35 ਸਕਿੰਟਾਂ ਬਾਅਦ ਮਰੀਜ਼ ਨੇ ਆਪਣੀਆਂ ਬਾਹਾਂ ਅਤੇ ਲੱਤਾਂ ਨੂੰ ਥੋੜਾ ਜਿਹਾ ਹਿਲਾਇਆ।

ਇਸ ਤੋਂ ਬਾਅਦ 12 ਸੈਕਿੰਡ ਹੋਰ CPR ਦੇਣ ਤੋਂ ਬਾਅਦ ਮਰੀਜ਼ ਉੱਠ ਕੇ ਬੈਠ ਗਿਆ। ਡੱਬੇ ਵਿੱਚ ਮੌਜੂਦ ਸਾਰੇ ਯਾਤਰੀਆਂ ਨੇ ਵੀ ਤਾੜੀਆਂ ਵਜਾਈਆਂ ਅਤੇ ਮਰੀਜ਼ ਦੀ ਜਾਨ ਬਚਾਉਣ ਲਈ ਡਾਕਟਰ ਈਸ਼ਾ ਦਾ ਧੰਨਵਾਦ ਕੀਤਾ। ਇੰਨਾ ਹੀ ਨਹੀਂ ਚੱਲਦੀ ਟਰੇਨ ‘ਚ ਯਾਤਰੀਆਂ ਨੇ ਡਾਕਟਰ ਈਸ਼ਾ ਭਾਰਦਵਾਜ ਦਾ ਸਨਮਾਨ ਵੀ ਕੀਤਾ।

ਇਸ ਦੌਰਾਨ ਰੇਵਾੜੀ ਸਟੇਸ਼ਨ ‘ਤੇ ਟੀਟੀ ਨੂੰ ਬੁਲਾ ਕੇ ਸੂਚਨਾ ਦਿੱਤੀ ਗਈ ਅਤੇ ਟਰੇਨ ਦੇ ਸਟੇਸ਼ਨ ‘ਤੇ ਪਹੁੰਚਣ ਤੋਂ ਪਹਿਲਾਂ ਹੀ ਉੱਥੇ ਐਂਬੂਲੈਂਸ ਬੁਲਾ ਲਈ ਗਈ। ਨਿਰਧਾਰਿਤ ਸਟਾਪੇਜ ਤੋਂ ਜ਼ਿਆਦਾ ਦੇਰ ਸਟੇਸ਼ਨ ‘ਤੇ ਟ੍ਰੇਨ ਰੋਕਣ ਤੋਂ ਬਾਅਦ ਮਰੀਜ਼ ਨੂੰ ਐਂਬੂਲੈਂਸ ਵਿਚ ਸ਼ਿਫਟ ਕੀਤਾ ਗਿਆ। ਉਸ ਨੂੰ ਨੇੜਲੇ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਜਾਂਚ ਦੌਰਾਨ ਪਤਾ ਲੱਗਾ ਕਿ ਉਸ ਦੇ ਦਿਲ ਦੀਆਂ ਤਿੰਨੋਂ ਨਾੜਾਂ ਬਲਾਕ ਹੋ ਗਈਆਂ ਹਨ।