Axiom Mission-4 ਫਿਰ ਮੁਲਤਵੀ, ਸ਼ੁਭਾਂਸ਼ੂ ਸ਼ੁਕਲਾ ਨੇ ਅੱਜ ਸ਼ਾਮ ਨੂੰ ਭਰਨੀ ਸੀ ਉਡਾਣ
11 Jun 2025 12:27 PM
ਭਾਰਤੀ ਪੁਲਾੜ ਯਾਤਰੀ ਸ਼ੁਭਾਂਸ਼ੂ ਸ਼ੁਕਲਾ ਅਤੇ 3 ਹੋਰਾਂ ਨੂੰ ਅੰਤਰਰਾਸ਼ਟਰੀ ਪੁਲਾੜ ਕੇਂਦਰ (ISS) ਲੈ ਕੇ ਜਾਣ ਵਾਲਾ ਐਕਸੀਓਮ-4 ਮਿਸ਼ਨ (Axiom-4 mission) ਫਿਲਹਾਲ ਲਈ ਮੁਲਤਵੀ ਕਰ ਦਿੱਤਾ ਗਿਆ ਹੈ, ਕਿਉਂਕਿ ਇੰਜੀਨੀਅਰਾਂ ਨੇ ਸਪੇਸਐਕਸ ਦੇ ਫਾਲਕਨ-9 ਰਾਕੇਟ ਵਿੱਚ ਲੀਕ ਦੀ ਮੁਰੰਮਤ ਲਈ ਹੋਰ ਸਮਾਂ ਮੰਗਿਆ ਹੈ।
Axiom Mission-4 ਫਿਰ ਮੁਲਤਵੀ
ਭਾਰਤੀ ਪੁਲਾੜ ਯਾਤਰੀ ਸ਼ੁਭਾਂਸ਼ੂ ਸ਼ੁਕਲਾ ਦੇ ਪੁਲਾੜ ਜਾਣ ਦੇ ਸੁਪਨੇ ਤੇ ਬ੍ਰੇਕ ਲੱਗ ਗਿਆ ਹੈ। ਸ਼ੁਭਾਂਸ਼ੂ ਅਤੇ 3 ਹੋਰਾਂ ਨੂੰ ਅੰਤਰਰਾਸ਼ਟਰੀ ਪੁਲਾੜ ਸਟੇਸ਼ਨ (ISS) ਲੈ ਕੇ ਜਾਣ ਵਾਲਾ ਐਕਸੀਓਮ-4 ਮਿਸ਼ਨ ਫਿਲਹਾਲ ਲਈ ਮੁਲਤਵੀ ਕਰ ਦਿੱਤਾ ਗਿਆ ਹੈ, ਕਿਉਂਕਿ ਇੰਜੀਨੀਅਰਾਂ ਨੇ ਸਪੇਸਐਕਸ ਦੇ ਫਾਲਕਨ-9 ਰਾਕੇਟ ਵਿੱਚ ਲੀਕ ਦੀ ਮੁਰੰਮਤ ਲਈ ਹੋਰ ਸਮਾਂ ਮੰਗਿਆ ਹੈ।
ਸਪੇਸਐਕਸ ਨੇ ਐਲਾਨ ਕੀਤਾ ਕਿ ਉਹ ਪੋਸਟ-ਸਟੈਟਿਕ ਬੂਸਟਰ ਜਾਂਚ ਦੌਰਾਨ ਪਛਾਣੇ ਗਏ ਤਰਲ ਆਕਸੀਜਨ ਲੀਕ ਦੀ ਮੁਰੰਮਤ ਲਈ ਐਕਸੀਓਮ-4 ਮਿਸ਼ਨ ਦੇ ਫਾਲਕਨ-9 ਦੀ ਲਾਂਚਿੰਗ ਤੋਂ “ਪਿੱਛੇ ਹਟ” ਰਿਹਾ ਹੈ। ਸਪੇਸਐਕਸ ਨੇ ਆਪਣੇ ਸੋਸ਼ਲ ਮੀਡੀਆ ਪਲੇਟਫਾਰਮ ‘ਤੇ ਇੱਕ ਪੋਸਟ ਵਿੱਚ ਕਿਹਾ, “ਸਪੇਸਐਕਸ ਬੁੱਧਵਾਰ ਨੂੰ ਐਕਸ-4 ਦੇ ਫਾਲਕਨ 9 ਲਾਂਚ ਤੋਂ ਪਿੱਛੇ ਹਟ ਰਿਹਾ ਹੈ ਤਾਂ ਜੋ ਟੀਮਾਂ ਨੂੰ ਪੋਸਟ ਸਟੈਟਿਕ ਫਾਇਰ ਬੂਸਟਰ ਨਿਰੀਖਣ ਦੌਰਾਨ ਪਛਾਣੇ ਗਏ LOX ਲੀਕ ਦੀ ਮੁਰੰਮਤ ਲਈ ਵਾਧੂ ਸਮਾਂ ਦਿੱਤਾ ਜਾ ਸਕੇ।”
ਨਵੀਂ ਲਾਂਚ ਮਿਤੀ ਦਾ ਐਲਾਨ ਕਰੇਗਾ: ਸਪੇਸਐਕਸ
ਸਪੇਸਐਕਸ ਨੇ ਇਹ ਵੀ ਕਿਹਾ, “ਇੱਕ ਵਾਰ ਇਹ ਪੂਰਾ ਹੋ ਜਾਣ ਅਤੇ ਰੇਂਜ ਦੀ ਉਪਲਬਧਤਾ ਨੂੰ ਦੇਖਦੇ ਹੋਏ ਅਸੀਂ ਇੱਕ ਨਵੀਂ ਲਾਂਚ ਤਾਰੀਕ ਦਾ ਐਲਾਨ ਕਰਾਂਗੇ।”
ਸ਼ੁਭਾਂਸ਼ੂ ਸ਼ੁਕਲਾ ਲਗਭਗ 41 ਸਾਲਾਂ ਬਾਅਦ ਇੱਕ ਭਾਰਤੀ ਦੇ ਤੌਰ ‘ਤੇ ਪੁਲਾੜ ਲਈ ਉਡਾਣ ਭਰਨ ਵਾਲਾ ਸੀ। ਹੁਣ ਇਸਨੂੰ ਹੋਰ ਇੰਤਜ਼ਾਰ ਕਰਨਾ ਪਵੇਗਾ। ਇਸ ਤੋਂ ਪਹਿਲਾਂ, ਰਾਕੇਸ਼ ਸ਼ਰਮਾ ਨੇ ਸੋਵੀਅਤ ਯੂਨੀਅਨ ਦੇ ਇੰਟਰਕੋਸਮੌਸ ਪ੍ਰੋਗਰਾਮ ਰਾਹੀਂ 8 ਦਿਨਾਂ ਲਈ ਧਰਤੀ ਦੀ ਪਰਿਕਰਮਾ ਕੀਤੀ ਸੀ।
14 ਦਿਨਾਂ ਦੀ ਸੀ ਇਹ ਪੁਲਾੜ ਯਾਤਰਾ
ਲਖਨਊ ਵਿੱਚ ਜਨਮੇ ਸ਼ੁਭਾਂਸ਼ੂ ਸ਼ੁਕਲਾ ਭਾਰਤੀ ਪੁਲਾੜ ਖੋਜ ਸੰਗਠਨ (ਇਸਰੋ) ਅਤੇ ਨਾਸਾ-ਸਮਰਥਿਤ ਐਕਸੀਓਮ ਸਪੇਸ ਦੇ ਵਪਾਰਕ ਪੁਲਾੜ ਯਾਨ ਦਾ ਹਿੱਸਾ ਹਨ। ਪਹਿਲਾਂ ਤੋਂ ਨਿਰਧਾਰਤ ਸ਼ਡਿਊਲ ਦੇ ਅਨੁਸਾਰ, ਇਸਨੂੰ ਬੁੱਧਵਾਰ ਸ਼ਾਮ ਨੂੰ ਫਲੋਰੀਡਾ ਦੇ ਕੈਨੇਡੀ ਸਪੇਸ ਸੈਂਟਰ ਤੋਂ ਅੰਤਰਰਾਸ਼ਟਰੀ ਪੁਲਾੜ ਕੇਂਦਰ ਲਈ 14 ਦਿਨਾਂ ਦੀ ਯਾਤਰਾ ਲਈ ਰਵਾਨਾ ਹੋਣਾ ਸੀ।
ਇਹ ਵੀ ਪੜ੍ਹੋ
Standing down from tomorrows Falcon 9 launch of Ax-4 to the @Space_Station to allow additional time for SpaceX teams to repair the LOx leak identified during post static fire booster inspections. Once complete and pending Range availability we will share a new launch date pic.twitter.com/FwRc8k2Bc0
— SpaceX (@SpaceX) June 11, 2025
10 ਅਕਤੂਬਰ 1985 ਨੂੰ ਜਨਮੇ ਸ਼ੁਭਾਂਸ਼ੂ ਨੇ ਨੈਸ਼ਨਲ ਡਿਫੈਂਸ ਅਕੈਡਮੀ (ਐਨਡੀਏ) ਵਿੱਚ ਸ਼ਾਮਲ ਹੋਣ ਤੋਂ ਪਹਿਲਾਂ ਸਿਟੀ ਮੋਂਟੇਸਰੀ ਸਕੂਲ ਤੋਂ ਆਪਣੀ ਸਕੂਲੀ ਪੜ੍ਹਾਈ ਕੀਤੀ। ਉਨ੍ਹਾਂ ਨੂੰ 2006 ਵਿੱਚ ਭਾਰਤੀ ਹਵਾਈ ਸੈਨਾ ਵਿੱਚ ਕਮਿਸ਼ਨ ਮਿਲਿਆ ਸੀ ਅਤੇ ਉਨ੍ਹਾਂ ਨੂੰ ਸੁਖੋਈ-30 ਐਮਕੇਆਈ, ਮਿਗ-29, ਜੈਗੁਆਰ ਅਤੇ ਡੋਰਨੀਅਰ-228 ਸਮੇਤ ਕਈ ਤਰ੍ਹਾਂ ਦੇ ਜਹਾਜ਼ਾਂ ‘ਤੇ 2,000 ਘੰਟਿਆਂ ਤੋਂ ਵੱਧ ਉਡਾਣ ਦਾ ਤਜਰਬਾ ਹੈ। ਉਨ੍ਹਾਂ ਨੇ ਇੰਡੀਅਨ ਇੰਸਟੀਚਿਊਟ ਆਫ਼ ਸਾਇੰਸ (ਆਈਆਈਐਸ), ਬੈਂਗਲੁਰੂ ਤੋਂ ਏਰੋਸਪੇਸ ਇੰਜੀਨੀਅਰਿੰਗ ਵਿੱਚ ਐਮਟੈਕ ਦੀ ਡਿਗਰੀ ਵੀ ਪ੍ਰਾਪਤ ਕੀਤੀ ਹੈ।
ਸ਼ੁਭਾਂਸ਼ੂ ਗਗਨਯਾਨ ਮਿਸ਼ਨ ਦਾ ਹਿੱਸਾ
ਭਾਰਤੀ ਹਵਾਈ ਸੈਨਾ ਦੇ ਗਰੁੱਪ ਕੈਪਟਨ ਸ਼ੁਭਾਂਸ਼ੂ ਸ਼ੁਕਲਾ ਨੂੰ 2019 ਵਿੱਚ ਗਗਨਯਾਨ ਮਿਸ਼ਨ ਲਈ ਭਾਰਤ ਦੀ ਪੁਲਾੜ ਯਾਤਰੀ ਟੀਮ ਦਾ ਹਿੱਸਾ ਬਣਨ ਲਈ ਹੋਰ ਅਧਿਕਾਰੀਆਂ ਅੰਗਦ ਪ੍ਰਤਾਪ, ਪ੍ਰਸ਼ਾਂਤ ਬਾਲਕ੍ਰਿਸ਼ਨਨ ਨਾਇਰ ਅਤੇ ਅਜੀਤ ਕ੍ਰਿਸ਼ਨਨ ਦੇ ਨਾਲ ਚੁਣਿਆ ਗਿਆ ਸੀ। ਇਸ ਗਗਨਯਾਨ ਦੇ 2027 ਵਿੱਚ ਲਾਂਚ ਹੋਣ ਦੀ ਸੰਭਾਵਨਾ ਹੈ।
ਗਰੁੱਪ ਕੈਪਟਨ ਸ਼ੁਭਾਂਸ਼ੂ ਸ਼ੁਕਲਾ ਦੀ ਇਸ ਪੁਲਾੜ ਯਾਤਰਾ ਨੂੰ ਭਾਰਤ ਦੀ ਮਨੁੱਖੀ ਪੁਲਾੜ ਉਡਾਣ ਵਿੱਚ ਵਾਪਸੀ ਦਾ ਪ੍ਰਤੀਕ ਮੰਨਿਆ ਜਾ ਰਿਹਾ ਹੈ ਕਿਉਂਕਿ 41 ਸਾਲ ਪਹਿਲਾਂ ਰਾਕੇਸ਼ ਸ਼ਰਮਾ ਨੇ 1984 ਵਿੱਚ ਸੋਵੀਅਤ ਰੂਸ ਦੇ ਸੋਯੂਜ਼ ਪੁਲਾੜ ਯਾਨ ਵਿੱਚ ਪੁਲਾੜ ਦੀ ਯਾਤਰਾ ਕੀਤੀ ਸੀ।