ਕੈਨੇਡਾ ਤੋਂ ਪਰਤਨਾ ਟਰੰਪ ਦੀ ਪੁਰਾਣੀ ਆਦਤ, ਕਿਮ ਜੋਂਗ ਉਨ ਦੀ ਮੀਟਿੰਗ ਲਈ ਵੀ ਛੱਡ ਆਏ ਸਨ G7 ਸਮਿਟ

G-7 ਤੋਂ ਅਚਾਨਕ ਅਮਰੀਕਾ ਪਰਤੇ ਟਰੰਪ

Follow Us On

ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਇੱਕ ਵਾਰ ਫਿਰ ਦੁਨੀਆ ਦੇ ਸਭ ਤੋਂ ਸ਼ਕਤੀਸ਼ਾਲੀ ਦੇਸ਼ਾਂ ਦੀ ਮੀਟਿੰਗ ਸਮੇਂ ਤੋਂ ਪਹਿਲਾਂ ਛੱਡ ਕੇ ਚਲੇ ਗਏ। ਮਾਮਲਾ ਕੈਨੇਡਾ ਵਿੱਚ ਚੱਲ ਰਹੇ G7 ਸੰਮੇਲਨ ਦਾ ਹੈ। ਡੋਨਾਲਡ ਟਰੰਪ ਕੈਨੇਡਾ ਦੇ ਪ੍ਰਿੰਸ ਐਡਵਰਡ ਆਈਲੈਂਡ ਵਿੱਚ ਹੋ ਰਹੀ G7 ਮੀਟਿੰਗ ਵਿੱਚ ਸ਼ਾਮਲ ਹੋਣ ਲਈ ਆਏ ਸਨ, ਪਰ ਨਿਰਧਾਰਤ ਪ੍ਰੋਗਰਾਮ ਤੋਂ ਪਹਿਲਾਂ ਹੀ ਸਮਿਟ ਛੱਡ ਕੇ ਚਲੇ ਗਏ। ਕਾਰਨ? ਮੱਧ ਪੂਰਬ ਵਿੱਚ ਜੰਗ ਦੀ ਵਧਦੀ ਅੱਗ ਅਤੇ ਵਾਸ਼ਿੰਗਟਨ ਵਿੱਚ ਹਾਲਾਤ ‘ਤੇ ਸਿੱਧਾ ਕੰਟਰੋਲ ਰੱਖਣ ਦੀ ਇੱਛਾ।

ਟਰੰਪ ਸਿਰਫ਼ ਮੀਟਿੰਗ ਹੀ ਨਹੀਂ ਛੱਡ ਕੇ ਗਏ, ਜਾਂਦੇ ਸਮੇਂ ਉਨ੍ਹਾਂ ਨੇ ਤਹਿਰਾਨ ਦੇ ਲੋਕਾਂ ਨੂੰ ਰਾਜਧਾਨੀ ਖਾਲੀ ਕਰਨ ਦੀ ਸਲਾਹ ਵੀ ਦੇ ਦਿੱਤੀ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਸੋਸ਼ਲ ਮੀਡੀਆ ‘ਤੇ ਖੁੱਲ੍ਹਾ ਸੰਕੇਤ ਦਿੱਤਾ ਕਿ ਜੇਕਰ ਹਾਲਾਤ ਵਿੱਚ ਸੁਧਾਰ ਨਹੀਂ ਹੁੰਦਾ ਹੈ, ਤਾਂ ਅਮਰੀਕਾ ਸਿੱਧੀ ਫੌਜੀ ਕਾਰਵਾਈ ਕਰ ਸਕਦਾ ਹੈ। ਟਰੰਪ ਨੇ ਵ੍ਹਾਈਟ ਹਾਊਸ ਦੇ ਸਿਚੁਏਸ਼ਨ ਰੂਮ ਵਿੱਚ ਰਾਸ਼ਟਰੀ ਸੁਰੱਖਿਆ ਪ੍ਰੀਸ਼ਦ ਨੂੰ ਤਿਆਰ ਰਹਿਣ ਦਾ ਹੁਕਮ ਦਿੱਤਾ ਹੈ।

2018 ਵਿੱਚ ਵੀ G7 ਛੱਡੀ ਸੀ ਅਧੂਰੀ…

ਇਹ ਪਹਿਲੀ ਵਾਰ ਨਹੀਂ ਹੈ ਕਿ ਟਰੰਪ ਨੇ ਕੈਨੇਡਾ ਵਿੱਚ ਹੋ ਰਹੇ G7 ਸੰਮੇਲਨ ਨੂੰ ਅੱਧ ਵਿਚਕਾਰ ਛੱਡਿਆ ਹੋਵੇ। 2018 ਵਿੱਚ ਵੀ, ਟਰੰਪ ਕਿਊਬੈਕ ਵਿੱਚ ਚੱਲ ਰਹੇ ਸੰਮੇਲਨ ਨੂੰ ਅਧੂਰਾ ਛੱਡ ਕੇ ਸਿੰਗਾਪੁਰ ਚਲੇ ਗਏ ਸਨ, ਜਿੱਥੇ ਉਨ੍ਹਾਂ ਦੀ ਉੱਤਰੀ ਕੋਰੀਆਈ ਤਾਨਾਸ਼ਾਹ ਕਿਮ ਜੋਂਗ ਉਨ ਨਾਲ ਇਤਿਹਾਸਕ ਮੁਲਾਕਾਤ ਹੋਣੀ ਸੀ। ਉਸ ਸਾਲ, ਟਰੰਪ ਨੇ ਪਹਿਲਾਂ ਤੋਂ ਤੈਅ ਕੀਤੇ ਸਾਂਝੇ ਬਿਆਨ ‘ਤੇ ਦਸਤਖਤ ਕਰਨ ਤੋਂ ਇਨਕਾਰ ਕਰ ਦਿੱਤਾ ਅਤੇ ਕੈਨੇਡਾ ਦੇ ਤਤਕਾਲੀ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੂੰ ਬੇਈਮਾਨ ਅਤੇ ਕਮਜ਼ੋਰ ਤੱਕ ਵੀ ਕਹਿ ਦਿੱਤਾ। ਉਸ ਸਮੇਂ ਵੀ, ਦੁਨੀਆ ਦੇ ਵੱਡੇ ਨੇਤਾ ਟਰੰਪ ਦੇ ਅਚਾਨਕ ਜਾਣ ਤੋਂ ਹੈਰਾਨ ਸਨ।

ਸਾਂਝੇ ਬਿਆਨ ਤੋਂ ਵੀ ਕੀਤਾ ਸੀ ਕਿਨਾਰਾ

ਸਮਿਟ ਵਿੱਚ ਜਦੋਂ ਸਾਰੇ G7 ਦੇਸ਼ ਯੁੱਧ ਰੋਕਣ ਦੀ ਅਪੀਲ ਕਰਨ ਵਾਲਾ ਸਾਂਝਾ ਬਿਆਨ ਜਾਰੀ ਕਰਨ ਦੀ ਤਿਆਰੀ ਕਰ ਰਹੇ ਸਨ, ਤਾਂ ਟਰੰਪ ਨੇ ਇਸ ਤੋਂ ਆਪਣੇ ਆਪ ਨੂੰ ਦੂਰ ਕਰ ਲਿਆ, ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੁਅਲ ਮੈਕਰੋਨ ਨੇ ਕਿਹਾ ਕਿ ਟਰੰਪ ਜੰਗਬੰਦੀ ਲਈ ਕਿਸੇ ਫਾਰਮੂਲੇ ‘ਤੇ ਵਿਚਾਰ ਕਰ ਰਹੇ ਹਨ। ਟਰੰਪ ਸ਼ਾਇਦ ਕੂਟਨੀਤਕ ਹੱਲ ਬਾਰੇ ਗੱਲ ਕਰ ਰਹੇ ਹੋਣਗੇ, ਪਰ ਉਨ੍ਹਾਂ ਦੀ ਭਾਸ਼ਾ ਵਿੱਚ ਸਪੱਸ਼ਟ ਤੌਰ ‘ਤੇ ਤਲਖੀ ਨਜ਼ਰ ਆਈ। ਇਹ ਫੈਸਲਾ ਆਸਟ੍ਰੇਲੀਆਈ ਪ੍ਰਧਾਨ ਮੰਤਰੀ ਐਂਥਨੀ ਅਲਬਾਨੀਜ਼ ਲਈ ਇੱਕ ਵੱਡਾ ਝਟਕਾ ਸੀ, ਜੋ ਟਰੰਪ ਨਾਲ ਆਪਣੀ ਪਹਿਲੀ ਆਹਮੋ-ਸਾਹਮਣੇ ਗੱਲਬਾਤ ਲਈ ਉਤਸ਼ਾਹਿਤ ਸਨ, ਜਿਸ ਵਿੱਚ AUKUS ਪ੍ਰਮਾਣੂ ਪਣਡੁੱਬੀ ਡੀਲ ਅਤੇ ਵਪਾਰ ਵਰਗੇ ਮੁੱਦੇ ਸ਼ਾਮਲ ਸਨ।

‘ਅਮਰੀਕਾ ਫਸਟ’ ਟਰੰਪ ਦੀ ਨੀਤੀ , ਬਾਕੀ ਦੁਨੀਆ ਕਰੇ ਇੰਤਜ਼ਾਰ

ਡੋਨਾਲਡ ਟਰੰਪ ਨੇ ਹਮੇਸ਼ਾ ‘ਅਮਰੀਕਾ ਫਸਟ’ ਦੀ ਨੀਤੀ ਦੀ ਪਾਲਣਾ ਕੀਤੀ ਹੈ। ਚਾਹੇ ਉਹ ਅੰਤਰਰਾਸ਼ਟਰੀ ਡੀਲ ਹੋਣ, ਜਲਵਾਯੂ ਸੰਮੇਲਨ ਹੋਣ ਜਾਂ G7 ਵਰਗੇ ਪਲੇਟਫਾਰਮ। ਜੇਕਰ ਉਹ ਮਹਿਸੂਸ ਕਰਦੇ ਹਨ ਕਿ ਘਰੇਲੂ ਮੁੱਦੇ ਵਧੇਰੇ ਮਹੱਤਵਪੂਰਨ ਹਨ, ਤਾਂ ਉਹ ਵਿਦੇਸ਼ੀ ਮੀਟਿੰਗਾਂ ਨੂੰ ਛੱਡਣਾ ਗਲਤ ਨਹੀਂ ਸਮਝਦੇ। ਇੱਕ ਵਾਰ ਫਿਰ, ਉਨ੍ਹਾਂ ਨੇ ਇਹੀ ਦਿਖਾਇਆ ਹੈ। ਮਿਡਿਲ ਈਸਟ ਵਿੱਚ ਜੰਗ, ਵਾਸ਼ਿੰਗਟਨ ਦੀਆਂ ਤਿਆਰੀਆਂ ਅਤੇ ਆਪਣੀ ਖੁਦ ਦੀ ਛਵੀ ਦੇ ਵਿਚਕਾਰ, ਟਰੰਪ ਨੇ ਇੱਕ ਵਾਰ ਫਿਰ ਸਾਬਤ ਕਰ ਦਿੱਤਾ ਹੈ ਕਿ ਜਦੋਂ ਅਮਰੀਕਾ ਦੀ ਗੱਲ ਆਉਂਦੀ ਹੈ, ਤਾਂ ਬਾਕੀ ਸਭ ਕੁਝ, ਭਾਵੇਂ ਇਹ ਮਹੱਤਵਪੂਰਨ ਕਿਉਂ ਨਾ ਹੋਵੇ, ਸੈਕੰਡਰੀ ਹੋ ਜਾਂਦਾ ਹੈ।