Shocking Video: ਗੇਟ ਥੱਲੇ ਦੱਬਣ ਨਾਲ ਡੇਢ ਸਾਲਾਂ ਮਾਸੂਮ ਬੱਚੀ ਦੀ ਮੌਤ, ਘਟਨਾ ਸੀਸੀਟੀਵੀ ਕੈਮਰੇ ‘ਚ ਹੋਈ ਕੈਦ

ਗੇਟ ਥੱਲੇ ਦੱਬਣ ਨਾਲ ਡੇਢ ਸਾਲਾਂ ਮਾਸੂਮ ਬੱਚੀ ਦੀ ਮੌਤ, ਘਟਨਾ ਸੀਸੀਟੀਵੀ ਕੈਮਰੇ 'ਚ ਹੋਈ ਕੈਦ

ਲੁਧਿਆਣਾ ਦੇ ਮਾਛੀਵਾੜਾ ਨੇੜੇ ਪਿੰਡ ਹਿਯਾਤਪੁਰ ‘ਚ ਇੱਕ ਡੇਢ ਸਾਲਾਂ ਬੱਚੀ ਦੀ ਗੇਟ ਥੱਲੇ ਦੱਬ ਜਾਉਣ ਨਾਲ ਮੌਤ ਹੋ ਗਈ। ਡੇਢ ਸਾਲਾਂ ਬਾਣੀ ਵਿਹੜੇ ‘ਚ ਖੇਡ ਰਹੀ ਸੀ ਤੇ ਖੇਡਦੇ-ਖੇਡਦੇ ਉਹ ਗੇਟ ‘ਤੇ ਚੜ੍ਹਨ ਲੱਗੀ, ਇਸ ਦੌਰਾਨ ਗੇਟ ਉਸ ਤੇ ਡਿੱਗ ਗਿਆ ਤੇ ਉਸ ਥੱਲੇ ਦੱਬ ਜਾਉਣ ਕਾਰਨ ਮੌਤ ਹੋ ਗਈ। ਇਸ ਦਰਦਨਾਕ ਹਾਦਸੇ ਦੀ ਵੀਡੀਓ ਸੀਸੀਟੀਵੀ ਕੈਮਰੇ ‘ਚ ਰਿਕਾਰਡ ਹੋ ਗਈ।

ਜਾਣਕਾਰੀ ਮੁਤਾਬਕ ਮ੍ਰਿਤਕ ਬਾਣੀ ਕੌਰ ਦੇ ਪਿਤਾ ਦਰਸ਼ਨ ਸਿੰਘ ਦਾ ਤਲਾਕ ਹੋ ਗਿਆ ਸੀ। ਉਸ ਦਾ ਵਿਆਹ ਤਿੰਨ ਸਾਲ ਪਹਿਲਾਂ ਹੋਇਆ ਸੀ ਤੇ ਬਾਣੀ ਕੌਰ ਦੇ ਪੈਦਾ ਹੋਣ ਤੋਂ ਬਾਅਦ ਤਲਾਕ ਹੋ ਗਿਆ। ਬਾਅਦ ‘ਚ ਦਰਸ਼ਨ ਸਿੰਘ ਰੋਜ਼ੀ-ਰੋਟੀ ਕਮਾਉਣ ਲਈ ਅਮਰੀਕਾ ਚਲਾ ਗਿਆ। ਬਾਣੀ ਦੀ ਪਰਵਰਿਸ਼ ਉਸ ਦੀ ਦਾਦੀ ਗੁਰਦੇਵ ਕੌਰ ਕਰ ਰਹੀ ਸੀ।

ਮਾਮਲੇ ਦੀ ਜਾਂਚ ਕਰ ਰਹੀ ਪੁਲਿਸ

ਥਾਣਾ ਮੁੱਖੀ ਪਵਿੱਤਰ ਸਿੰਘ ਨੇ ਦੱਸਿਆ ਕਿ ਮ੍ਰਿਤਕ ਦੀ ਦਾਦੀ ਨੇ ਬਿਆਨ ਦਰਜ ਕਰਵਾਏ ਕਿ ਘਰ ਵਿੱਚ ਮਿਸਤਰੀ ਟਾਈਲਾਂ ਲਗਾ ਰਹੇ ਸਨ। ਮਿਸਤਰੀਆਂ ਵੱਲੋਂ ਇਸ ਦੌਰਾਨ ਗੇਟ ਖੋਲ੍ਹ ਕੇ ਕੰਧ ਨਾਲ ਖੜ੍ਹਾ ਕਰ ਦਿੱਤਾ ਗਿਆ। ਬਾਣੀ ਖੇਡਦੇ ਹੋਏ ਗੇਟ ਉੱਪਰ ਚੜ੍ਹਨ ਲੱਗੀ ਤਾ ਗੇਟ ਡਿੱਗ ਗਿਆ ਤੇ ਬਾਣੀ ਦੱਬ ਗਈ।

ਬਾਣੀ ਦੀ ਆਵਾਜ਼ ਸੁਣ ਕੇ ਮਿਸਤਰੀਆਂ ਨੇ ਲੋਹੇ ਗੇਟ ਹੇਠੋਂ ਬਾਣੀ ਨੂੰ ਕੱਢਿਆ ਤੇ ਹਸਪਤਾਲ ਲੈ ਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਥਾਣਾ ਮੁੱਖੀ ਨੇ ਦੱਸਿਆ ਕਿ ਬੱਚੀ ਦਾ ਪੋਸਟ ਮਾਰਟਮ ਕਰਵਾਇਆ ਜਾ ਰਿਹਾ ਹੈ।

ਇਸ ਵੀਡੀਓ ਨੂੰ ਵੇਖਣ ਤੋਂ ਬਾਅਦ ਲੋਕ ਕਾਫੀ ਡਰੇ ਹੋਏ ਹਨ। ਉਹ ਬੱਚੀ ਦੇ ਪਰਿਵਾਰ ਵਾਲਿਆਂ ਦੇ ਅਣਗਹਿਲੀ ਵਰਤਣ ਦੇ ਵੀ ਆਰੋਪ ਲਗਾ ਰਹੇ ਹਨ। ਕੁਝ ਲੋਕ ਕਹਿ ਰਹੇ ਹਨ ਕਿ ਜੇਕਰ ਘਰ ਵਿੱਚ ਉਸਾਰੀ ਦਾ ਕੰਮ ਚੱਲ ਰਿਹਾ ਸੀ ਤਾਂ ਬੱਚੀ ਦੇ ਖੇਡਣ ਵੇਲ੍ਹੇ ਉਸਦੇ ਨੇੜੇ ਕੋਈ ਕਿਉਂ ਨਹੀਂ ਦਿਖਾਈ ਦੇ ਰਿਹਾ। ਉਸਾਰੀ ਦੇ ਕੰਮ ਦੌਰਾਨ ਮਾਪਿਆਂ ਨੂੰ ਬੱਚਿਆਂ ਦਾ ਖਾਸ ਖਿਆਲ ਰੱਖਣਾ ਚਾਹੀਦਾ ਹੈ।