22-08- 2024
TV9 Punjabi
Author: Ramandeep Singh
ਕਈ ਮਹੀਨਿਆਂ ਦੇ ਲਗਾਤਾਰ ਟੀ-20 ਕ੍ਰਿਕਟ ਤੋਂ ਬਾਅਦ ਹੁਣ ਟੈਸਟ ਕ੍ਰਿਕਟ ਦਾ ਕ੍ਰੇਜ਼ ਵਧ ਗਿਆ ਹੈ ਅਤੇ ਇਸ ਦਾ ਅਸਰ ਮਾਨਚੈਸਟਰ 'ਚ ਦੇਖਣ ਨੂੰ ਮਿਲਿਆ।
ਉਮੀਦਾਂ ਮੁਤਾਬਕ ਇੰਗਲੈਂਡ ਅਤੇ ਸ਼੍ਰੀਲੰਕਾ ਵਿਚਾਲੇ ਟੈਸਟ ਸੀਰੀਜ਼ ਦੇ ਪਹਿਲੇ ਮੈਚ ਦੇ ਪਹਿਲੇ ਦਿਨ ਤੇਜ਼ ਗੇਂਦਬਾਜ਼ ਚੰਗੀ ਫਾਰਮ 'ਚ ਸਨ।
ਇੰਗਲੈਂਡ ਦੇ ਗੇਂਦਬਾਜ਼ਾਂ ਦਾ ਜੋ ਕੰਮ ਸੀ ਉਹ ਉਨ੍ਹਾਂ ਨੇ ਕੀਤਾ ਪਰ ਸ਼੍ਰੀਲੰਕਾ ਦੇ ਇੱਕ ਗੇਂਦਬਾਜ਼ ਨੇ ਗੇਂਦਬਾਜ਼ੀ ਦੀ ਬਜਾਏ ਬੱਲੇਬਾਜ਼ੀ ਕਰਕੇ ਹਲਚਲ ਮਚਾ ਦਿੱਤੀ।
ਸ਼੍ਰੀਲੰਕਾ ਲਈ ਆਪਣਾ ਟੈਸਟ ਡੈਬਿਊ ਕਰ ਰਹੇ 28 ਸਾਲਾ ਤੇਜ਼ ਗੇਂਦਬਾਜ਼ ਮਿਲਨ ਰਤਨਾਇਕੇ ਨੇ ਟੈਸਟ ਕ੍ਰਿਕਟ 'ਚ ਆਪਣੇ ਪਹਿਲੇ ਹੀ ਦਿਨ 72 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡੀ।
ਇਸ ਨਾਲ ਮਿਲਨ ਨੇ 9ਵੇਂ ਨੰਬਰ ਜਾਂ ਇਸ ਤੋਂ ਹੇਠਾਂ ਬੱਲੇਬਾਜ਼ੀ ਕਰਦੇ ਹੋਏ ਟੈਸਟ ਡੈਬਿਊ ਵਿਚ ਸਭ ਤੋਂ ਵੱਧ ਸਕੋਰ ਬਣਾਉਣ ਦਾ ਵਿਸ਼ਵ ਰਿਕਾਰਡ ਬਣਾਇਆ, ਜੋ ਇਸ ਤੋਂ ਪਹਿਲਾਂ ਭਾਰਤ ਦੇ ਬਲਵਿੰਦਰ ਸੰਧੂ (71) ਦੇ ਨਾਂ ਸੀ।
ਇੰਨਾ ਹੀ ਨਹੀਂ, ਮਿਲਨ ਨੇ ਕਪਤਾਨ ਧਨੰਜਯਾ ਡੀ ਸਿਲਵਾ (74) ਨਾਲ ਮਿਲ ਕੇ 8ਵੀਂ ਵਿਕਟ ਲਈ 63 ਦੌੜਾਂ ਦੀ ਅਹਿਮ ਸਾਂਝੇਦਾਰੀ ਕੀਤੀ ਅਤੇ ਟੀਮ ਨੂੰ 226 ਦੌੜਾਂ ਤੱਕ ਲੈ ਕੇ ਜਾਣ ਤੋਂ ਬਾਅਦ ਉਹ ਆਊਟ ਹੋ ਗਏ।
ਸ਼੍ਰੀਲੰਕਾ ਨੇ 6 ਦੌੜਾਂ 'ਤੇ 3 ਵਿਕਟਾਂ ਅਤੇ 6 ਵਿਕਟਾਂ ਸਿਰਫ 92 ਦੌੜਾਂ 'ਤੇ ਗੁਆ ਦਿੱਤੀਆਂ ਸਨ, ਜਿਸ ਤੋਂ ਬਾਅਦ ਟੀਮ ਨੇ ਡੀ ਸਿਲਵਾ ਅਤੇ ਮਿਲਨ ਦੀ ਪਾਰੀ ਨਾਲ 236 ਦੌੜਾਂ ਬਣਾਈਆਂ।